Salmos 6 - Bible in Tzotzil de Chenalhó with Deuterocanon

Sc'opanel Dios c'alal oy at-o'nton

Q'ueoj yu'un David. Laj yich' q'uejintael ta sonetic ti yich'oj vaxquib yaq'uile; ja' la sventain li banquilal yu'un jq'ueojetique.

¹ Muc'ul Dios, mu me ta sc'ac'aluc avo'nton xataq'uiun; mu me xa'ilin ti chavac'bun nucule.

² Muc'ul Dios, avocoluc c'uxubinun me, yu'un toj alubenun chca'ay. Muc'ul Dios, ac'bun jtsatsal yan velta, yu'un chnic scotol jbec'tal.

³ Toj ch'ayem xa no'ox co'nton chca'ay. Muc'ul Dios, ¿c'usi to ora chatal?

⁴ Muc'ul Dios, la' me coltaun; coltaun ta sventa slequil avo'nton.

⁵ Li boch'otic chamenic xae, mu xa xasna'icot. ¿Boch'o to xu' chayalbot lec ac'oplal te ta yavil animaetic?

⁶ Lubenun xa ta oq'uel. Jujun ac'ubal puru oq'uel ta jpas ta jvayab; solel ach'em xa jxonjol ta ya'lel jsat.

⁷ Ic'uxub xa jsat ta scoj li jvocole; chmac xa jsat ta scoj chiyac'bicun jvocol li cajcontrataque.

⁸ ¡Voc'o abaic loq'uel ta jtojol, vo'oxuc ti toj chopoloxuque!, yu'un li Muc'ul Diose laj xa ya'ibun li jc'op ti ep chi'oq'ue.

⁹ Laj xa ya'ay ti xivocolet ta stojole; laj xa stsacbun li jc'ope.

¹⁰ Scotol li cajcontrae chlic q'uexovicuc, chlic jinicuc o; jmaq'uel no'ox ta satil chlic jatovicuc loq'uel ta scoj q'uexlal.