Salmos 59 - Bible in Tzotzil de Chenalhó with Deuterocanon

Li Davide la sc'an coltael yu'un Dios ta sventa milel

Q'ueoj yu'un David. Ja'o ti c'alal yorail ibat yich' pamuc'tael ta sna ta smantal Saule. “Mu xavulesun”, xi sbi snuq'uilal laj yac'be.

¹ Dios cu'un, coltaun me ta sventa li cajcontrataque; ac'o me colcun ta sc'ob li boch'o liquemic ta jcontrainele.

² Coltaun me ta sventa li boch'otic chopol yo'ntonique; pojun me ta sventa li jmilvanejetique.

³ Yu'un ja' xa no'ox tsmalaic c'usi ora tsc'an chismilicun; laj xa stsob sbaic ta jcontrainel li boch'o lec xu' yu'unique. Pero muc ta scojuc jmul, muc ta scojuc jtoyobbail, Muc'ul Dios.

⁴ Muc ta scojuc c'usi chopol jpasoj ti yac'ojbeic yipal chisnutsicune. Lican me; la' me nupun ta be; la' me q'uelun.

⁵ Vo'ot, Muc'ul Dios, vo'ot ti chapas ta mantal scotole, vo'ot li Diosot yu'un Israele, lican me, la' ac'bo stoj smulic li boch'otic mu xayich'icot ta muq'ue. Mu me xc'uxubaj ta avo'nton li boch'o tstoy sbaic xchi'uc li c'usi chopol tsc'an chispasbicune.

⁶ C'alal tsutic tal ta jujun mal c'ac'ale, xvojlajetic no'ox jech chac c'u cha'al ts'i'etic, chtal sjoyibtaic li lume.

⁷ Oy c'usi ep chloc' ta yeic; xco'laj xchi'uc oy espada ta yeic, jech chalic: “Mu'yuc boch'o chijya'yutic”, xiic.

⁸ Pero li vo'ote, Muc'ul Dios, xatse'in no'ox yu'unic; chalaban no'ox li boch'o mu xayich'icot ta muq'ue.

⁹ Vo'ot no'ox jpatoj o co'nton ta atojol, yu'un vo'ot Diosot, vo'ot jpojubbailot, vo'ot chachabiun.

¹⁰ Li Dios ti c'uxun ta yo'ntone, ja' ba'yucbe chbat cu'un; chiyac'bun quil c'u x'elan tsalbil chcom li cajcontrataque.

¹¹ Mu me xamil o ta j'ech'el, yu'un jech mu xch'ay o ta yo'ntonic li jchi'iltaque. Ja' no'ox puco batel ta atsatsal; j'ech'el tsalbil ac'o comicuc o. Li vo'ote, Muc'ul Dios, jmacubbail c'otemot.

¹² Ta sventa li c'usi laj yalique, li c'usi iloc' ta yeique, ep la sta smulic o. Te chucul ac'o comicuc o ta sventa li stoyobbailique, xchi'uc ta sventa li bolc'op, xchi'uc li epalc'opetic iloc' ta yeique.

¹³ Lajesbo sc'oplalic ta j'ech'el ta scoj li sc'ac'al avo'ntone; mu xa me xcomic li' ta banamil, yu'un jech ac'o yich' na'el ti vo'ot chapas mantal ta stojol li Jacob c'alal to ta slajeb banamil, vo'ot li Diosote.

¹⁴ Yu'un c'alal tsutic tal ta jujun mal c'ac'ale, xvojlajetic no'ox jech chac c'u cha'al ts'i'etic, chtal sjoyibtaic li lume.

¹⁵ Chtal xanovicuc, yu'un tsa'ic boch'o tsti'ic; me muc sta yo'ntonic oe, chliquic ta me'on oq'uel.

¹⁶ Pero li vu'une xila'et no'ox ta sq'uejintael li avu'ele. Ta jujun sob ta jq'uejinta alequilal ta sventa ti c'uxun ta avo'ntone, yu'un vo'ot laj achabiun, vo'ot laj apojun ti c'alal tsots jvocole.

¹⁷ Jcoltavanej cu'un, chiq'uejin ta aventa, yu'un vo'ot Diosot cu'un, vo'ot jnac'ubbail c'otemot, vo'ot li Diosot ti toj c'uxun ta avo'ntone.