Salmos 58 - Bible in Tzotzil de Chenalhó with Deuterocanon

Sc'anel chapanel ta stojol Dios

Q'ueoj yu'un David; ja' la sventain li banquilal yu'un jq'ueojetique. “Mu xavulesun”, xi sbi snuq'uilal laj yac'be.

¹ Vo'oxuc li jchapanvanejoxuque, ¿me ta melel ti lec tuc' chachapanvanique? ¿Me lec tuc' chachapanic li cristianoetique?

² Mu'yuc. Puru chopol c'usi anopoj ta avo'ntonic ti c'alal chachapanvanique; ja' no'ox chac'an chapasic li c'usi sventa chlic o utbail, majbail avu'unique.

³ Li boch'otic chopol yo'ntonique jech ono'ox yo'ntonic o c'alal tiq'uilic ta yut xch'ut sme'ic. Li j'epalc'opetique jech ono'ox stalelic o ti c'alal mu'yuc to'ox chvoq'uique.

⁴ Oy svenenoalic jech chac c'u cha'al orachon. Ja' jechic jech chac c'u cha'al jti'val chon ti toj simarone, ti mu sc'an xa'ay c'ope,

⁵ ti mu xa stuc'ulan c'alal tstijic música li jtijsonetique. Ac'o me lec xa chtijbatic li música sventa spajesubil simaronilique, pero mu xa'yic o.

⁶ Dios cu'un, c'asbo li stanal yeique; Muc'ul Dios, c'asbo sts'uts'upic li leonetic le'e.

⁷ Ac'o ch'ayicuc o ta banamil jech chac c'u cha'al vo' ti c'alal chmal ta banamile. C'alal tst'ilesic li flechaetic yu'unique, toj lilijel ac'o c'otuc.

⁸ Ac'o ulicuc jech chac c'u cha'al puy ti te ch-ul ta yut sna c'alal tsmats' ya'lele; mu xa me xilic saquil osil jech chac c'u cha'al li boch'o chamen chvoq'ue.

⁹ Ta anil no'ox ac'o lajicuc jech chac c'u cha'al ch'ix ti ta anil no'ox chc'ac', ti mu'yuc c'usi chc'ac'ub yu'une. Ja' jech ta anil no'ox ac'o lajicuc, ac'o ulicuc; ac'o yich'ic cuchel batel ta tsatsal ic'al vo'.

¹⁰ Li boch'o tuc' yo'ntonique xcuxet no'ox yo'nton c'alal chilic tstabeic spacol li yajcontraique; tspoc yacanic o ya'yel ta xch'ich'al li boch'otic chopolique.

¹¹ Jech chlic yalic: “Ta melel xloc' venta ti tuc' co'ntontique; ta melel oy jun Dios chchapanbe smul li cristianoetique”, xiic.