Salmos 57 - Bible in Tzotzil de Chenalhó with Deuterocanon

La sc'an coltael ta stojol Dios li Davide

Q'ueoj yu'un David ti c'alal ijatov batel bat snac' sba ta nailch'en ta scoj li Saule. “Mu xavulesun”, xi sbi li snuq'uilal laj yac'bee. Ja' la sventain li banquilal yu'un jq'ueojetique.

¹ Dios cu'un, c'uxubinun me, avocoluc c'uxubinun me, yu'un jch'unoj ti vo'ot no'ox chacoltaune; ta jnac' jba ta yolon axic', ja' to me ijelov scotol li jvocole.

² Ta jc'anbe vocol li Dios te oy ta vinajele, ja' li Dios ti oyun ta yo'ntone.

³ Ja' chistacbun yalel tal ta vinajel li c'uxubinel yu'une xchi'uc li c'usi melelic yaloje; ja' chiscoltaun ta sventa li boch'o chisnutsicun ta sc'ac'al yo'ntonique.

⁴ Xco'laj xchi'uc oyun ta o'lol leonetic; te xa mocholun ta stojol li viniquetic ti tsc'an chisti'icune. Li stanal yeique xco'laj xchi'uc lanza xchi'uc flechaetic; li yoq'uique ja' jech chac c'u cha'al espada ti lec ts'ubts'ub sni'e.

⁵ Dios cu'un, ich'bilucot o ta muc' c'alal to ta vinajel; ac'o nojuc ta alequilal sbejel li banamile.

⁶ La syaquicun yalojic ti bu chijelove; ilaj xa jtsatsal yu'unic chca'ay; la sjoq'uic jun ch'en sventa te chi'och yalel yu'unic, pero ja' te ibalch'uj yalel stuquic.

⁷ Dios cu'un, li co'ntone chapal sventa chaquich'ot ta muc'; chapal xa sventa chasq'uejintabot q'ueojetic.

⁸ Co'nton, cuxo xa me; sonetic, licanic xa me. Ta xilic ti c'alal tsacub tale.

⁹ Cajval, ta xcal alequilal ta stojol li yantic lumetique; ta jq'uejinta alequilal ta stojol li yantic banamile.

¹⁰ Yu'un toj muc' li c'uxubinel avu'une; x'ech' to smuc'ul jech chac c'u cha'al li vinajele; staoj c'alal to vinajel li c'usitic melel chavale.

¹¹ Dios cu'un, ich'bilucot ta muc' c'alal to ta vinajel; nojuc ta alequilal sbejel li banamile.