Salmos 56 - Bible in Tzotzil de Chenalhó with Deuterocanon

Li Davide la sc'an coltael c'alal te xa setel li yajcontrae

Q'ueoj yu'un David; ja' yorail ti c'alal laj yich' tsaquel yu'un filistaetic te ta lum Gate. Li q'ueoje ja' “I'uts'intavan banquilaletic ta namal banamil”, xi sbi.

¹ Dios cu'un, c'uxubinun me, yu'un oy ep boch'o li' tsc'an chixvoch'iun; scotol c'ac'al tsc'an chiyac'bicun jvocol, tsc'an chiyuts'intaicun.

² Li cajcontrataque scotol ora tsc'an chixpech'icun ta teq'uel, toj ep li boch'o chiscontrainicun ta stoyobbailique.

³ C'alal yorail oy xi'el chca'ye, ja' no'ox ta jpat co'nton ta atojol.

⁴ Ta xcalbe slequilal sc'op li Diose, yu'un ja' no'ox jpatoj co'nton o yu'un, jech mu'yuc xi'el chca'ay. ¿C'usi xu' chispasbicun li cristianoetique?

⁵ Scotol c'ac'al chiyac'bicun jvocol; puru chopol c'usi tsnop chispasbicun.

⁶ Tstsobilan sbaic, tsnac' sbaic ta jujujot, st'unojicun ti bu chixanove; ja' no'ox tsmalaic c'usi ora xu' chistaicun ta milel.

⁷ Dios cu'un, ac'bo xcuchic li c'usi chopol tspasique; jineso ta sventa sc'ac'al avo'nton li lumetic yu'unique.

⁸ Li vo'ote avatoj xa ti jayib velta jatovenune. Tsobo me ti c'u xa yepal iloc' ya'lel jsate; yu'un te xa ats'ibaoj ta vun scotol.

⁹ C'alal ta jc'anbot vocol ta atojole, ta sutic batel ta spatic ta ora li cajcontrae; jna'oj lec ti li' oyot ta jtojol, vo'ot li Diosote.

¹⁰ Ja' jpatoj co'nton yu'un li Diose, ta xcalbe slequilal li sc'ope; ja' jpatoj co'nton yu'un li Muc'ul Diose, ta xquich'be ta muc' li sc'ope.

¹¹ Ja' jpatoj o co'nton yu'un li Diose, jech mu'yuc xi'el chca'ay. ¿C'usi xu' chispasbicun li cristianoetique?

¹² Dios cu'un, li c'usi caloj ta atojol ta jpase; li' ta jtoj ta yalel alequilal.

¹³ Yu'un laj acoltaun ta sventa li milele, laj avicobun li cacane, yu'un jech lec lixanov ta atojol, jech cuxulun to avu'un, Dios cu'un.