Salmos 55 - Bible in Tzotzil de Chenalhó with Deuterocanon

La sc'opan Dios c'alal nutsbil yu'un yajcontra li Davide

Q'ueoj yu'un David. La stijic ta sonetic ti oy yaq'uiltaque; ja' la sventain li banquilal yu'un jq'ueojetique.

¹ Dios cu'un, a'ibun me li jc'ope; mu me xanac' aba ti c'alal ta jc'anbot vocole.

² Tuc'ulanbun lec li ca'yeje; tac'bun me li jc'ope. Li' chi'oc' ta ac'opanel, chnic jutuc co'nton,

³ ja' ta scoj ti xvochlajetic no'ox ta jtojol, ti toj ep jvocol yu'unic li boch'o chopol yo'ntonique; snutsojicun ta sc'ac'al yo'ntonic.

⁴ Solel xpujpun li co'nton yu'unique; i'och xa ta co'nton li xi'elal lajele.

⁵ Oy xa xi'el, oy xa niquel chca'ay; solel chit'el xa ta scoj li tsots xi'ele.

⁶ Jech la jnop ta co'nton: “Oyuc c'uxi x'ayin jxic' jech chac c'u cha'al stsumute, xu' chivil batel ti jechuque, jech xu' ta jcux co'nton.

⁷ Xu' nom chijatov batel; xu' te to chc'ot naclicun ta xocol banamil ti jechuque.

⁸ Xu' anil chijatov batel ti jechuque, yu'un jech mu xistaun li muc'ta iq'ue, jech mu xistaun li chauquil vo'e”, xichi.

⁹ Cajval, uleso ta j'ech'el li cajcontrae; soquesbo li ya'yejique, yu'un quiloj ti ja' no'ox puru sa' c'op, ti puru liquesej c'op tspasic te ta lume.

¹⁰ Ta c'ac'al ta ac'ubal xlajun-xanubajic ta sba li coraltone; puru chopol, puru bol lo'il te tspasic.

¹¹ Puru sbolil yo'ntonic te oy ta stojolic; noj ta elec', noj ta lo'lavanej li xoraltic yu'unique.

¹² Mu ja'uc jun mero cajcontra ti lic scontrainune; ti ja'uque mu vocoluc chca'ay ti jechuque. Mu ja'uc lic scontrainun li boch'o stsoq'uet yo'nton ta jtojole; ti ja'uque xu' no'ox ta jnac' jba ti jechuque.

¹³ Ja' vo'ot lic acontrainun ti jchi'il to'ox jbatique, ti bats'i co'ol to'ox co'ntontique.

¹⁴ Co'ol laj calbe jbatic li c'usi mu jc'antic xvinaje; lec to'ox co'ol co'ntontic lijxanovutic ta xch'ulna li Diose.

¹⁵ Ch'ayel yo'nton ac'o taaticuc yu'un lajel li cajcontrae; cuxul ac'o yalicuc ta yavil animaetic, yu'un puru chopol c'usi oy ta yo'ntonic.

¹⁶ Yan li vu'une ja' no'ox ta jc'anbe vocol li Diose; ja' chiscoltaun li Muc'ul Diose.

¹⁷ Ta sob, ta o'lol c'ac'al, xchi'uc ta mal c'ac'al xivocolet ta stojol; xi'oc'olet ta stojol. Ta ono'ox chiya'ibun li jc'ope.

¹⁸ Ja' chispojun ti c'alal yorail tsacbilun ta pleitoe, ac'o me toj ep li cajcontrataque.

¹⁹ Li Dios ti ich'bil ono'ox ta muc' ta vo'onee chiya'ibun li jc'ope, jech ta xistsalbun li cajcontrae yu'un mu'yuc tsjel o li yo'ntonique; mu sc'an xich'ic o ta muc' li Diose.

²⁰ Yu'un chlic yuts'intaic noxtoc li yantic ti co'ol to'ox yo'ntonic xchi'uque; mu xc'ot ta pasel yu'unic ti yalojic lec chil sbaic oe.

²¹ Toj c'upil sba ya'yel li c'usi chloc' ta yeique, pero puru pasc'op oy ta yo'ntonic; lec c'unil c'op chloc' ta yeic ya'yel jech chac c'u cha'al aceite ti lec c'une, pero ja' jech chac c'u cha'al espada ti oy lec yee.

²² Ac'bo sventain Muc'ul Dios scotol li avocole; ja' chascoltaot, ja' chayicoot. Yu'un li stuque mu xac' yaluc ta lum li boch'o chch'unbe smantale.

²³ Dios cu'un, li jmilvanejetique li jlo'lavanejetique mu xcuxiic o; me j'o'loluc mu sc'upin ya'yic li xcuxlejalique, yu'un chavac' ochicuc yalel ta ch'en sventa ch'ayel, pero li vu'une ja' no'ox jpatoj co'nton o ta atojol.