Salmos 54 - Bible in Tzotzil de Chenalhó with Deuterocanon

La sc'an coltael yu'un Dios c'alal contrainbil li Davide

Sq'ueoj David; ja'o ti c'alal jech ay yalbeic Saúl li zifetique: “Li Davide te snac'oj sba ta jtojolcutic”, xutic. Le'e laj yich' q'uejintael ta sonetic ti oy yaq'uiltaque; ja' la sventain li banquilal yu'un jq'ueojetique.

¹ Dios cu'un, coltaun me ta sventa avu'el; pojun me ta sventa atsatsal,

² Dios cu'un, a'ibun me li jc'ope; tuc'ulanbun me li jbel cha'bel ca'yeje.

³ Yu'un liquemic ta jcontrainel li chopol viniquetique, ja' li j'uts'intavanejetique; chisa'icun yu'un tsc'an chismilicun. Mu'yuc ta yo'ntonic o li Diose.

⁴ Pero li vu'une, ja' Dios chiscoltaun; ja' Cajvaltic sventainojbun li jcuxlejale.

⁵ Ja' chac' joybijuc ta sba stuquic c'usi chopol snopojic li cajcontrae; Dios, tsalbun o li cajcontrae, yu'un jbel sc'oplal li c'usi avaloje.

⁶ Ta jmilbot amoton ta yutsil co'nton; ta xcal alequilal, Muc'ul Dios, yu'un toj lecot.

⁷ Yu'un vo'ot laj acoltaun ta sventa scotol jvocol; laj quil ta jsat ti iyavnaijic o avu'un li cajcontrataque.