Salmos 53 - Bible in Tzotzil de Chenalhó with Deuterocanon

Scotol cristianoe ch'ayemic, mu'yuc Dios ta yo'ntonic

Sq'ueoj David c'alal i'ipaj; ja' la sventain li banquilal yu'un jq'ueojetique.

¹ Li boch'o bolique jech tsnop ta yo'ntonic: “Mu'yuc Dios”, xiic. Scotolic vovijem sjolic; ja' no'ox tspasic o li c'usitic toj chopolique; me junuc mu'yuc boch'o tspas li c'usi leque.

² Pero li Diose ta vinajel to tsq'uel yalel tal li cristianoetique, tsq'uel yil me oy boch'o cha'ibe jutuc smelol; tsq'uel me oy boch'o tsc'an tsa' li Diose.

³ Pero scotolic sva'lupatinojic comel li Diose; scotolic ch'ayemic o ta be. Mu'yuc boch'o tspas li c'usi leque; me junuc, mu'yuc o ta j'ech'el.

⁴ Li boch'o tspasic c'usitic chopole mu xa'ibeic smelol, ja' tsti'ic ya'yel li steclumal Diose; tstsaquic jech chac c'u cha'al tstsac pan sve'ic; mu'yuc ta yo'nton tsc'anbeic vocol li Diose.

⁵ Ac'o me mu'yuc c'usi xi'bal sba, pero chniquic ta xi'el, yu'un li Diose jatsa bu tanmacal ibat sbaquil yu'un li boch'o tsc'an ox chcontrainvanique. Iyalic o ta q'uexlal, yu'un ibajatic o yu'un li Diose.

⁶ Oyuc c'uxi licuc tal coltael ta vits Sión ta stojol li Israele. C'alal chac'be slequilalic yan velta li steclumal Muc'ul Diose, toj xcuxet no'ox yo'ntonic li smomnich'nabtac Jacobe; toj solol no'ox yo'ntonic li jun ta lum Israele.