Salmos 51 - Bible in Tzotzil de Chenalhó with Deuterocanon

La sutes yo'nton yu'un smul li Davide

Q'ueoj yu'un David. Ja'o ti c'alal ay c'opanatuc yu'un j'alc'op Natán ta scoj ti la xchi'in sbaic xchi'uc Betsabee. Ja' la sventain li banquilal yu'un jq'ueojetique.

¹ Dios cu'un, c'uxubinun ta sventa slequil avo'nton; tu'pbun jmul ta sventa ti toj ep c'uxubinel avu'une.

² Pocbun o loq'uel ta j'ech'el li jchopolile; ch'aybun li jmule.

³ Ta jna' ti la jtoy jba ta atojole; mu xch'ay o ta co'nton li jmule.

⁴ Laj xa jta jmul ta atojol, tsots jmul la jta ta atojol; toj chopol li c'usi la jpas ta atojole. C'alal chachapanune, jech chvinaj ti tuc' chac'opoje, xchi'uc ti tuc' chachapanvane.

⁵ Li vu'une jpasmulilun ono'ox ti c'alal livoq'ue; jpasmulilun ono'ox c'alal lic xchi'inun tal li jme'e.

⁶ Ta melel li vo'ote ja' chac'an li boch'o melel xc'opoje; laj avac'bun jna' ta co'nton c'usi ta jpas.

⁷ Lecubtasun ta isopo te', jech lecuben chicom o; pocun me, jech xjelov to jsaquil chicom jech chac c'u cha'al li tayoe.

⁸ Ac'bun jun co'nton xchi'uc xcuxetel co'nton; cuxesbun lec co'nton, yu'un toj aluben licom ta scoj li vocol laj avac'bune.

⁹ Ch'aybun ta avo'nton li c'usi chopol la jpase; tu'pbun scotol li jmule.

¹⁰ Dios cu'un, jelbun li co'ntone; ac'o ach'ubuc li c'usi oy ta yut co'ntone.

¹¹ Mu me xajipun loq'uel ta atojol; mu me xaloq'uesbun ta jtojol li ach'ul Espiritue.

¹² Ac'bun yan velta xcuxetel co'nton ta sventa li coltael chavac'bune; ac'o stoyun liquel li Espíritu avu'une.

¹³ Jech xu' ta xcac'be yil abe li jpasmuliletique, jech xu' tsutes yo'ntonic ta atojol.

¹⁴ Dios cu'un, Jcoltavanej cu'un, coltaun me, yu'un jech mu xa ximilvan; ja' no'ox ac'o jq'uejinta ta q'ueoj ti lec tuc' xachapanvane.

¹⁵ Cajval, jambun li quee; ac'o jpuc batel li alequilale,

¹⁶ Yu'un muc ja'uc chac'an ti chajmilbot amotone; muc ja'uc chac'an ti chajchic'bot amotone. Ti ja'uc chac'ane, laj xa cac'bot ti jechuque.

¹⁷ Dios cu'un, ja' lec chavil, ja' amoton chc'ot chavil me ta jsutes co'ntoncutic ta atojole, me ta xcat co'ntoncutic yu'un li jmulcutique, xchi'uc me ta jbic'tajes jbacutic ta atojole.

¹⁸ Paso c'usi lec ta stojol li lum Sión ta sventa slequil avo'ntone; cha'va'anbo scoraltonal li lum Jerusalene.

¹⁹ Jech xu' chatsac li amoton ti sc'oplal chavich' milbele, xchi'uc li amoton ti chich' chiq'uel scotole, jech xu' chlic avich' ac'bel te ta scajleb amoton li ch'ium vacaxetique.