Salmos 50 - Bible in Tzotzil de Chenalhó with Deuterocanon

Ja' chchapan scotol cristianoetic li Diose

Q'ueoj yu'un Asaf.

¹ Li Muc'ul Diose ic'opoj, ja' li Dios yu'un scotol c'usitic cuybilic ta diose. Laj yic' scotol li cristianoetic ta banamile; laj yic' c'alal ta sloq'ueb c'ac'al, c'alal ta smaleb c'ac'al.

² Te ta vits Sión lic spuc batel xojobal; ja' li jun lum ti lec ts'acal o st'ujumale.

³ Li Dios cu'untique ta xtal, pero muc jeche'uc ch'anxi ti c'alal ta xtale; ta xtal xchi'uc c'oc' ti chchic'vane, joyibtabil tal ta tsatsal ic'.

⁴ Te ta toyol ta xlic yic' li boch'o te oyic ta vinajele, xchi'uc li boch'o li' oyic ta banamile, yu'un chchapan scotol li cristianoetique.

⁵ Jech chal: “Tsobo tal scotol li boch'o tuc' yo'ntonic ta jtojole, ja' li boch'otic oy c'usi la jchapan jchi'uque, ti laj yac'bicun milbil matanale”, xi.

⁶ Li vinajele ta xal ta jamal ya'yel ti ja' tuq'uil jchapanvanej li Diose.

⁷ “A'yo ava'yic jteclumal, ta xic'opoj; a'yo ava'ay Israel, oy c'usi jamal chacalbot: Vu'un Diosun, vu'un Diosun avu'un.

⁸ Mu ja'uc chacutot ta sventa li milbil matanal, xchi'uc li chic'bil matanal chavac'bicun ta jtojol scotol orae.

⁹ Mu ja'uc ta jc'anbot li ch'ium tot vacaxetic oy avu'une; mu ja'uc ta jc'anbot li tot tentsunetic te oy ta acorale.

¹⁰ Yu'un ja' cu'un scotol li chonbolometic oy ta te'tique; ja' cu'un li ts'unbil chonbolometic ta epal vitsetique.

¹¹ Ja' cu'un scotol li mutetique; scotol li c'usitic cuxajtic chbac' ta sba banamile ja' cu'un scotol.

¹² Me chivi'naj chca'ye, muc vo'oxuc chacalboxuc, yu'un ja' cu'un sbejel li banamile xchi'uc scotol li c'usitic te oye.

¹³ Li vu'une mu yu'unuc ta jti' li sbec'tal vacaxetic chavac'bicune; mu yu'unuc ta xcuch'be xch'ich'al li tentsunetique.

¹⁴ Li jmoton chavac'bicune ja' no'ox sventa chatojbicun ta vocol; ja' sventa ac'o c'otuc ta pasel avu'unic li c'usi avaloj chapasic ta jtojole.

¹⁵ Ti c'alal oy avocol chava'yique, c'opanicun me; vu'un chajcoltaoxuc, vo'oxuc chavich'icun ta muc'”, xi li Diose.

¹⁶ Li boch'otic chopolique jech ch-albatic yu'un li Diose: “¿C'usi aventa vo'ot ti chloc' ta ave li mantaletic cu'une, xchi'uc ti chalo'ilta li c'usi chapanbil cu'une?

¹⁷ Yu'un abajoj li tojobtasel cu'une; ava'lupatinoj comel li jc'ope.

¹⁸ Yan li j'eleq'ue ja' lec chavil; ja' jmoj avo'nton achi'uc li jmulaviletique.

¹⁹ Li c'usitic chopole xchi'uc li epalc'ope muc vocoluc chloc' ta ave, c'un ta alel chava'ay stuque.

²⁰ Chasa'be smul li achi'il ta voq'uele; chapucbe batel sc'oplal li boch'o jun ame' achi'uque.

²¹ C'alal jech laj apase, te no'ox ch'an xichi; laj anop ti ja' jech co'nton ec jech chac c'u cha'al avo'ntone. Pero tana ta asat chacalbot ava'ay lec li amule; chacac'bot avil c'u yepal.

²² “Vo'oxuc ti mu'yuc ta avo'ntonic Diose, a'yic me li c'usi laj cal li'i, yu'un naca me culesoxuc acotolic, mu'yuc boch'o xu' chascoltaoxuc o.

²³ Li boch'o colaval xiyutune, yu'un yich'ojun ta muc', li boch'o li' oy o ta jtojole, ja' ta jcolta”, xi li Diose.