Salmos 5 - Bible in Tzotzil de Chenalhó with Deuterocanon

Sc'anel vocol ta stojol Dios

Q'ueoj yu'un David. Laj yich' q'uejintael ta amaetic; ja' la sventain banquilal yu'un jq'ueojetic.

^1-2 Muc'ul Dios, vo'ot Ajvalilot, vo'ot Diosot cu'un, a'ibun me li jc'ope; tuc'ulanbun ti xina'et, ti xivocolet ta atojole, yu'un vo'ot no'ox chajc'opanot.

³ Muc'ul Dios, a'ibun me li jc'op ta sobe, yu'un ta ven sob ta jcholbot li jvocole; ja' xa no'ox ta jmalabe stac'ubil li jc'ope.

⁴ Vo'ot Diosot ti mu xac'upin c'usi chopole; li boch'otic chopolique mu xu' chc'aliic ta ats'el.

⁵ Mu'yuc yavilic te ta atojol li jtoybaetique; mu xac'an xaq'uel li boch'otic chopol c'usi tspasique,

⁶ Chavac'be stoj smul li j'epalc'opetique; chajip loq'uel ta atojol li boch'otic oy c'usi tspasic ta mucule xchi'uc li jmilvanejetique

⁷ Pero li vu'une ta slequil avo'nton xu' chi'och ta ch'ulna avu'un; xu' chaquich'ot batel ta muc' ta scotol co'nton ta stuq'uil li ch'ulna avu'une.

⁸ Muc'ul Dios, tojobtasun ta spasel c'usi lec tuc' chac'an, yu'un chiyilbajinicun li cajcontrataque; ic'un batel ta lequil be avu'un.

⁹ Yu'un li stuquique mu'yuc stu li c'usi chalique; solel boliben o li yut yo'ntonique. Li snuq'uique xco'laj xchi'uc ti'muquinaltic ti jamal sti'e; li yoq'uique ja' chtun yu'unic sventa chlo'lavanic.

¹⁰ ¡Dios cu'un, ac'bo stojic! Ac'o yalicuc ta lum stuquic ta scoj li c'usi snopojique; jipo loq'uel ta scoj ti yepal smul staojique, yu'un toj ep stoyoj sbaic ta atojol.

¹¹ Yan li boch'otic ja' no'ox tsa'ic coltael avu'une cuxetuc no'ox yo'ntonic; junuc no'ox yo'nton ac'o q'uejinicuc, yu'un vo'ot atuc chacolta. Li boch'otic sc'anojicote, vo'ot no'ox ta aventa ac'o cuxetuc yo'ntonic.

¹² Yu'un ja' chavac'be bendición li boch'otic tuc' yo'ntonique; li slequil avo'ntone ja' smaquic c'otem.