Salmos 49 - Bible in Tzotzil de Chenalhó with Deuterocanon

Altic ta jpat co'ntontic yu'un li taq'uine

Q'ueoj yu'un xnich'nab Coré; ja' la sventain li banquilal yu'un jq'ueojetique.

¹ Yajvaltac lumetic, jnaclumetic ta scotol banamil, a'yo lec ava'yic.

² A'yo ava'yic ec vo'oxuc ti jc'ulejoxuque, vo'oxuc ti me'onoxuque, vo'oxuc ti ich'biloxuc ta muq'ue, xchi'uc vo'oxuc ti biq'uit cha'ilatique.

³ Li' ta xic'opoj ta sventa jbijil; li' ta xcal li c'usi jnopoj ta co'ntone.

⁴ Chcac' lec jchiquin ta ya'yel li jaybel chanubtasele; ta arpa ta xcal li c'usi oy ta co'ntone.

⁵ ¿C'u yu'un ta xixi' ti c'alal chopol ora ta jtae, ti c'alal li' xa setel ta jtojol li c'usitic chopole?

⁶ Li boch'o spatoj yo'ntonic yu'un c'usi oy yu'unique stoyoj sba o xchi'uc li sc'ulejalique.

⁷ Pero mu xu' yu'un tscolta o xchi'ilic; mu xu' chac'beic xq'uexolin xchi'ilic ta stojol li Diose.

⁸ Yu'un li stojol jcuxlejaltique bats'i toyol stojol; me junuc mu'yuc boch'o xu' tsman

⁹ ti jech xu' chcuxi o sbatel osile, ti jech mu xa xcham oe.

¹⁰ Yu'un chquiltic ti jcotoltic chijchamutique; chcham c'alal ta boch'o lec bijic xchi'uc c'alal ta muc bijicuc. Li sc'ulejalique chbat ta yan.

¹¹ Ja' snaic o sbatel osil chc'ot li smuquinalique. Ja' yav snaic o chcom c'alal ta jujuc'ol yalab xnich'nabic, ac'o me stsacoj xa lec sbiic ta yosilic.

¹² Li cristianoetique mu xu' chcuxiic o ta sventa sc'ulejalic; ta xchamic jech chac c'u cha'al chcham chonbolometic.

¹³ Ja' jech chc'ot ta pasel ta stojol li boch'o bolique; ja' jech slajebic li boch'o c'upil cha'yic c'usi chal stuquique.

¹⁴ Li cristianoetic le'e ja' jchabivanej yu'unic li lajele; macbilic batel ta muquinal yu'un jech chac c'u cha'al macbilic batel ta scoralic li bic'tal chijetique. C'alal me isacub osile, ta stsalatic yu'un li boch'o tuc' yo'ntonique. J'ech'el ta xch'ayic o batel; ja' snaic chc'ot o li yavil animaetique.

¹⁵ Yan li Diose ja' chispojun ta sventa stsatsal li lajele; ja' chiyic'un batel stuc yu'un chbat jchi'in o.

¹⁶ Mu me xlo'ilaj avo'nton c'alal me oy boch'o tspas ta jc'ulej chavile, xchi'uc c'alal me toj c'upil sba tspas li sna chavile.

¹⁷ Yu'un c'alal ta xchame, mu'yuc chich' batel; mu co'oluc chyal ta ch'en xchi'uc li sc'ulejale.

¹⁸ Ac'o me toj xcuxet no'ox yo'nton ti c'alal cuxule, ac'o me lec ich'bil ta muc' ta sventa li sc'ulejale,

¹⁹ pero c'alal tsta yorail ta xchame, mu'yuc xa chtal sq'uel saquil osil yan velta.

²⁰ Yu'un li cristianoetique mu xu' chcuxiic o ta sventa sc'ulejalic; ja' co'ol chchamic jech chac c'u cha'al chonbolometic.