Salmos 48 - Bible in Tzotzil de Chenalhó with Deuterocanon

Slequil yutsil lum Sión, ja' li lum yu'un Diose

Q'ueoj yu'un xnich'nab Coré.

¹ Toj ech'em smuc'ul li Muc'ul Diose; ja' tsc'an ti ech'em ac'o albatuc slequilal te ta lum yu'une xchi'uc te ta ch'ul vits yu'une.

² Toj c'upil sba stayalil li vits Sione, ja' li vits yu'un stuc Diose. Toj xcuxet no'ox yo'nton yu'un scotol li banamile, ja' li slumal Muc'ul Ajvalile.

³ Li Diose te oy ta q'uelub osiletic yu'un Jerusalén; laj xa yac' sba ta ilel ti ja' mero jpojubbailtic stuque.

⁴ Yu'un li ajvaliletique la stsob sbaic batel; jmoj tsc'an tscontrainic ox li lume.

⁵ Pero c'alal laj yilic li lume, ich'ay yo'ntonic; mu'yuc xa jun yo'ntonic, jech ijatovic batel ta anil.

⁶ Iventainatic o yu'un li xi'ele; xbaletic xa ta xc'uxul ya'yel jech chac c'u cha'al jun ants ti ta xa xcuxe.

⁷ Toj xi'bal sba laj ya'yic jech chac c'u cha'al ic' chtal ta sloq'ueb c'ac'al ti chvoc' yu'un li barcoetic chliquic tal ta namal banamile.

⁸ Ti c'u x'elan laj ca'ibecutic sc'oplal li lum yu'un Muc'ul Dios ti tspas ta mantal scotole, ja' li lum yu'un Dios cu'untique, ja' jech laj quil ta jsatcutic noxtoc; ja' ti j'ech'el la sva'an o sbatel osil li Diose.

⁹ Dios cu'un, c'alal te oyuncutic ta ch'ulna avu'une, ta xvul ta co'ntoncutic ti toj ep xc'uxul avo'nton ta jtojolcutique.

¹⁰ Dios cu'un, ich'bilot ta muc' ta scotol banamil, jech chac c'u cha'al sc'oplal tsc'an ich'el ta muc' li abie. Noj ta abats'ic'ob li tuq'uil chapanel chavaq'ue.

¹¹ Li vits Sione toj xcuxet no'ox yo'ntonic; stse'inic no'ox li lumetic te ta Judae, yu'un lec tuc' chachapanvan.

¹² Xanovanic ta spat xocon li Sione; ato avilic c'u yepal li toyol q'uelub osiletic yu'une.

¹³ Q'uelo lec avilic ti c'u x'elan setbil ta coraltonetique, xchi'uc li muc'tic naetique, yu'un jech xu' chlic avalbe ya'yic ec li ts'acal olnich'onetique.

¹⁴ Yu'un li Diose ja' Dios cu'untic o sbatel osil; ja' jtojobtasvanej cu'untic o sbatel osil.