Salmos 47 - Bible in Tzotzil de Chenalhó with Deuterocanon

Li Diose ja' ajvalil sventa scotol banamil

Q'ueoj yu'un xnich'nab Coré; ja' la sventain li banquilal yu'un jq'ueojetique.

¹ Pac'o ac'ob acotolic ta jujun lum; cuxetuc no'ox avo'ntonic, avananic ta yalbel slequilal li Diose.

² Yu'un li Muc'ul Dios ti te oy ta vinajele ja' muc'ta Ajvalil ta sventa scotol banamil.

³ Laj xa slajesbe stsatsal scotol li lumetique, xchi'uc li jujun banamile; laj xa yac' ta jc'obtic scotol.

⁴ Laj xa st'ujbutic lec c'usi chijyac'butic, ja' li slequilale, ja' ti i'ac'bat li Jacob ti lec c'anbil yu'un Diose.

⁵ Li Muc'ul Diose toybil ta oq'ues imuy ta xchotleb, toybil ta yech'al yeic ti x'avetic no'ox ta scoj xcuxetel yo'ntonique.

⁶ Q'uejinanic, q'uejinanic yu'un li Diose; q'uejinanic, q'uejinanic yu'un li Ajvalil yu'un scotol banamile.

⁷ Yu'un li Diose ja' Ajvalil yu'un scotol li banamile, ja' yu'un q'uejintaic ta sventa q'ueojetic.

⁸ Li Diose ja' Ajvalil yu'un jujun banamil. Li Diose ichoti xa ta xch'ul chotleb.

⁹ Li banquilaletic ta jujun banamile laj xa stsob sbaic ta stojol li Dios yu'un Abrahame,

¹⁰ yu'un li Diose ja' yu'un scotol li jpasmantaletic ta banamile; ja' oy ta sc'ob scotol.