Salmos 45 - Bible in Tzotzil de Chenalhó with Deuterocanon

Q'ueoj sventa q'uin nupinel yu'un ajvalil

Q'ueoj yu'un xnich'nab Coré. “Nichim”, xi sbi snuq'uilal laj yac'beic. Q'ueoj sventa nupinel.

¹ Chnoj ta co'nton ep c'usitic lequic ta alel; li quee ja' jech ch-abtej jech chac c'u cha'al slapiz li boch'o toj lec anil sna' sts'ibaje, ja' yu'un li' chcal jun q'ueoj ta stojol li ajvalile.

² Li vo'ote toj c'upil aba ta scotol li viniquetique; puru lequic c'usi chloc' ta ave, ja' yu'un li Diose j'ech'el yac'ojbot o bendición.

³ Chuquino lec avespada, vo'ot ti lec tsots avo'ntone; ja' at'ujumal, axi'elal ac'o c'otuc.

⁴ Ta sventauc xa no'ox alequil avutsil xapas canal. Ac'o vu'uc avu'un ta sventa ti puru melel c'usi oy ta avo'ntone, xchi'uc ta sventa ti biq'uit avac'oj abae xchi'uc ti tuc' c'usi chapase; ac'o vu'uc avu'un xapas c'usi toj xi'balic sba.

⁵ Ac'o yaluc ta lum ta atojol cristianoetic ta sventa li aflecha ti lec ts'ubajtic sni'e, ts'apajtic ac'o c'otuc ta yo'ntonic li avajcontrae, vo'ot li ajvalilote.

⁶ Muc'ul ajvalil, li avabtel sventa ajvalilale ja' sventa sbatel osil; li avaston avich'oje ja' sventa tuq'uil chapanel.

⁷ Yu'un ja' chac'an li c'usitic tuq'ue; ja' chacontrain li c'usi chopole, ja' yu'un la st'ujot li Diose, ja' li Dios avu'une. Laj yac'bot ep xcuxetel avo'nton; ja' mu sta jech ac'bilic li yantic achi'iltaque.

⁸ Li ac'u' apoq'ue lec xa ac'bil muil poxil, ja' li mirra, áloe, xchi'uc casiae. Chastoyicot lec ta sonetic te ta apasubmantal ti pasbil ta sts'uts'up tsemene.

⁹ Li stsebetic ajvaliletique te chtal xchi'inicot ta nupinel; li me' ajvalil avu'une te xa va'al ta abats'ic'ob lec xa c'ac'umtasbil ta lequil c'anal taq'uin.

¹⁰ Tseb, a'yo ava'ay c'usi chacalbot. Ch'ayo ta avo'nton li achi'iltaque xchi'uc li sna atot ame'e.

¹¹ Toj lec c'upil aba chayilot li ajvalile; ich'o me ta muc', yu'un ja' xa avajval.

¹² Li tsebetic ta lum Tiroe chtalic xchi'uc ep matanal; li lumetic ti jc'ulejique chayac'bicot amoton, yu'un tsc'an lec ac'o avilic.

¹³ Li tsebe ta xa x'och batel xchi'uc st'ujumal; li sc'u' spoq'ue capbil ta jalel ta puru c'anal taq'uin.

¹⁴ Slapoj batel lec c'upilic sba sc'u' spoc' ti c'alal ch-ic'at batel ta stojol ajvalile. Chi'inbil batel yu'un yantic tojol tsebetic; ja' xchi'iltac c'alal chc'ot ta stojol li ajvalile.

¹⁵ Xcuxet no'ox yo'ntonic, stse'inic no'ox chtalic; te ch-ochic ta spasubmantal li ajvalile.

¹⁶ Ajvalil, li anich'nabtaque ja' ch-ochic ta xq'uexol li amoltotac ta vo'onee; ja' chavac' ochicuc o ta pasmantal ta scotol avosilal.

¹⁷ Mu'yuc ta xcac' ch'ayuc o ta alel abi ta scotol li jayc'ol cristianoetic chjelovique; j'ech'el chayich'icot o ta muc' li cristianoetique.