Salmos 44 - Bible in Tzotzil de Chenalhó with Deuterocanon

Sc'anel coltael ta stojol Dios

Q'ueoj yu'un xnich'nab Coré; ja' la sventain li banquilal yu'un jq'ueojetique.

¹ Dios cu'un, ca'yojcutic lec ta jchiquincutic, yalojbun ca'icutic jtot jme'cutic ti oy c'usi lec laj apas ta stojolic li jmoltot jyame'cutic ta vo'onee.

² Ta avu'el ta atsatsal laj anuts loq'uel scotol li muc'tic lumetique; laj avac'be stoj smulic, laj aloq'ues batel ta yosilalic. Ja' te laj avac' naclicuc li jmoltot jyame'cutic ta vo'onee.

³ Muc ta yabteluc yoc sc'obic, muc ta sventauc yespadaic ti ivu' yu'un itsalvanique. Ja' ta sventa atsatsal avu'el; ja' ta sventa xojobal asat ti ivu' yu'unique, yu'un toj c'uxic ta avo'nton.

⁴ Dios cu'un, Ajvalil cu'un, vo'ot laj avac' tal coltael ta stojol li Jacobe.

⁵ Vo'ot ta aventa la jtsalcutic li cajcontracutique; vo'ot ta aventa ti pech'bil ta teq'uel icom cu'uncutique.

⁶ Yu'un mu ja'uc jpatoj co'nton yu'un li jflechae; mu ja'uc jpatoj co'nton chiscoltaun li quespadae.

⁷ Vo'ot laj achabiuncutic ta sventa li cajcontracutique; laj avac' q'uexovicuc li boch'otic chislabanuncutique.

⁸ Vo'ot no'ox ta aventa ti scotol ora jun co'ntoncutic avu'une, jech sbatel osil chaquich'otcutic o ta muc'.

⁹ Pero li' ta orae laj xa abajuncutic; laj xa avac'uncutic ta q'uexlal. Mu'yuc xa chloc' achi'in ta paspleito li cajsoldadocutique.

¹⁰ Laj avac' jatovcuncutic sutel ta anil yu'un li cajcontracutique; laj avac' yelc'an c'usi oy cu'uncutic li boch'o chopol yo'nton ta jtojolcutique.

¹¹ Laj avac'uncutic ta c'abal jech chac c'u cha'al chij ti yu'un xa chich' milele; laj apucuncutic batel ta yantic banamil.

¹² Jeche' no'ox laj achon batel li ateclumale; me jutuc mu'yuc c'usi laj ata o.

¹³ Laj avac'uncutic ta chopolc'optael yu'un li boch'otic nopol nacal lic'ot jchi'uccutique; laj avac'uncutic ta q'uexlal, ta na'leel yu'un li boch'otic li' setuojuncutique.

¹⁴ Laj avac'uncutic ta lo'iltael yu'un li yantic banamiletique; scotol li boch'o chiyiluncutique tsjimulan sjolic ta jtojolcutic.

¹⁵ Scotol c'ac'al puru q'uexlal chca'icutic; xjumlajet ta c'oc' li jsat quelovcutique.

¹⁶ Yu'un x'avlajetic no'ox ta jna'leel, ta jq'uexlaltasel li cajcontrataque, yu'un oy ta yo'nton tsc'an chispacbicun.

¹⁷ Ti jech ic'ot ta pasel ta jtojolcutique, mu yu'unuc ch'ayemot ta co'ntoncutic; mu'yuc bu jbajojcutic li c'usi achapanoje.

¹⁸ Mu'yuc bu yanijem co'ntoncutic ta atojol; mu'yuc bu jtamojcutic batel yantic be.

¹⁹ Pero laj anet'uncutic batel ta chuculaltic ti bu oy ep vocole; laj amacuncutic ta xyaxinal li lajele.

²⁰ Lajuc jch'ayot ta co'ntoncutique, oyuc laj quich'cutic ta muc' yantic diosetic jech chac c'u cha'al chaquich'otcutic ta muq'ue,

²¹ laj ana' ti jechuque, Dios cu'un, yu'un li vo'ote xavotquin c'usi ta jnop ta yut co'ntoncutic.

²² Pero tana, vo'ot ta aventa ti oy jc'oplalcutic chilajcutic ta milele; chapal jc'oplalcutic chilajcutic ta milel jech chac c'u cha'al jcot chij ti chapanbil xa chich' milele.

²³ Cajval, ¿c'u yu'un ti xco'laj xchi'uc vayemot ta jtojolcutique? Julovan, Cajval. Mu me j'ech'eluc xajipuncutic ta avo'nton.

²⁴ ¿C'u yu'un ti chanac' asat ta jtojolcutique? ¿C'u yu'un ti lach'ay ta avo'nton ti ep jvocolcutic, ti abul jbacutique?

²⁵ Solel lajem jtsatsalcutic o; yalemuncutic o ta lum ta j'ech'el.

²⁶ La' me pojuncutic; c'uxubinuncutic ta sventa li slequil avo'ntone.