Salmos 42 - Bible in Tzotzil de Chenalhó with Deuterocanon

LIBRO II (Salmos 42—72 ) Ja' no'ox jcoltavanej cu'untic o li Diose

Q'ueoj yu'un xnich'nab Coré; ja' la sventain li banquilal yu'un jq'ueojetique.

¹ Dios cu'un, x'oc' x'avan co'nton sc'anel coltael ta atojol, jech chac c'u cha'al batem yo'nton sa'el yoxo' yuch' ta uc'um li te'tical chije.

² Toj taquin co'nton chca'ay ta stojol li Diose, ja' li j'ac'cuxlejale. ¿Baq'uin to xu' chibat, chbat jva'an jba ta stojol li Diose?

³ Yu'un ta c'ac'al ta ac'ubal ja' xa jve'elinoj li ya'lel jsate, pero ja'o jech chquich' jac'bel noxtoc: “¿Bu oy li Dios avu'une?”, xiyuticun.

⁴ C'alal ta jnopilan li jvocole, yo'to chisnet'un batel chca'ay. Te cht'ab ta co'nton c'u x'elan c'alal la jchi'in to'ox li yepal jchi'iltaque, ti c'alal laj quiq'uic batel ta ch'ulna yu'un Diose. Toj xcuxet no'ox, xi'avlajetcutic no'ox ta yalbel slequilal li Diose; ja' jun muc'ta q'uin laj ca'ay.

⁵ ¿C'u yu'un ti ep chc'unib co'ntone? ¿C'u yu'un ti ep chcac'be slo'il co'ntone? Yu'un ja' no'ox jpatoj o co'nton ta stojol li Diose, ja' li Dios ti mu xlaj co'nton ta yalbel slequilale, yu'un ja' jcoltavanej cu'un, ja' Dios cu'un.

⁶ Dios cu'un, toj c'uniben co'nton chca'ay, ja' yu'un lic jna'ot tal te to ta yosilal uc'um Jordán, te to ta vitsetic yu'un Hermón xchi'uc ta Mizar.

⁷ Yu'un xtac'ov to jujujot ch'entic yu'un li tsatsal vo' chavac' tale; ic'ot ta jba li tsatsal vo' ti cocanbil no'ox ital avu'une.

⁸ Pero ta c'ac'altique chatacbun tal li c'uxubinel avu'une; ta ac'ubaltique chavac'bun jun lec q'ueoj ta jtojol. Mu xipaj o ta ac'opanel, vo'ot li Diosot yu'un jcuxlejale.

⁹ Jech laj calbe li Diose: “Jpojubbail, ¿c'u yu'un ti lach'ayun xa ta avo'ntone? ¿C'u yu'un ti scotol c'ac'al puru at-o'nton, puru vocol chca'ay ta scoj li cajcontrataque?”, xcut.

¹⁰ C'alal xa ta jbaquil chti'vanan ta uts'intael yu'un li cajcontrataque; jujun c'ac'al jech chiyalbicun: “¿Bu oy li Dios avu'une?”, xiic.

¹¹ ¿C'u yu'un ti ep chc'unib co'ntone? ¿C'u yu'un ti ep chcac'be slo'il co'ntone? Yu'un ja' no'ox jpatoj co'nton o ta stojol li Diose, ja' li Dios ti mu xlaj co'nton ta yalbel slequilale, yu'un ja' jcoltavanej cu'un, ja' Dios cu'un.