Salmos 41 - Bible in Tzotzil de Chenalhó with Deuterocanon

La sc'an coltael sventa xchamel li Davide

Q'ueoj yu'un David; ja' la sventain li banquilal yu'un jq'ueojetique.

¹ Xcuxet no'ox yo'nton li boch'o oy ta yo'nton me'onetique, yu'un ja' chcoltaat yu'un Muc'ul Dios ti c'alal yorail oy svocole.

² Ja' chchabiat yu'un li Muc'ul Diose, ta x'ac'bat xcuxlejal; xcuxet no'ox yo'nton chjelov li' ta banamil; mu x'ac'at ta c'abal ta sc'ob li yajcontrataque.

³ Ja' ta xcoltaat yu'un Muc'ul Dios ti c'alal mochol ta svayab oy c'usi c'ux cha'ye; li xchamele ta xc'ataj ta stsatsal sbec'tal.

⁴ Jech laj cal: “Muc'ul Dios, avocoluc c'uxubinun, tsatsubtasun, ac'o me ep jtaoj jmul ta atojol”, xichi.

⁵ Pero li cajcontrataque tsc'anic ti ac'o ipajcun oe. “¿Baq'uin to chcham? ¿C'usi to ora xu' chch'ay ta alel li sbie?”, xiic.

⁶ C'alal chtal sq'uelicun scuyojique, spasel no'ox yu'unic; te snac'oj ta yo'ntonic li c'usi chopol snopojique. C'alal chloq'uic batele, ja'o chlic yalic li c'usi snopojique.

⁷ Li boch'otic stsoq'uet yo'ntonic cu'une, jmoj tstsob sbaic; tsnopic ti ta scoj jmul ti jech ip chca'ye.

⁸ Jech chalic: “Le'e ja' yabtel pucuj li chamel ip cha'ye; le'e imochi o ta svayab, mu'yuc xa bu tstots o”, xiic.

⁹ Li boch'o co'ol co'nton jchi'uc, ti lec to'ox jpatoj co'nton yu'une, xchi'uc ti jmoj to'ox chive' jchi'uque, ic'ataj xa ta cajcontra noxtoc.

¹⁰ Pero li vo'ote, Muc'ul Dios, c'uxubinun me; totsun liquel, jech xu' ta xcac'be stojic li c'usi chispasbicune.

¹¹ Jech ta jna' o ti lec chavilune, xchi'uc jech mu teuc no'ox tstse'in o ta jtojol li cajcontrataque.

¹² Yan li vu'un ti tuc' co'nton ta atojole, lec anitojun ta ac'ob; j'ech'el avic'ojun o ta atojol.

¹³ Ac'o ich'atuc ta muc' li Muc'ul Diose, ja' li Dios yu'un Israele; ich'biluc ta muc' li' ta ora xchi'uc ta sbatel osil, ¡Jechuc! ¡Jechuc!