Salmos 40 - Bible in Tzotzil de Chenalhó with Deuterocanon

Laj yalbe slequilal Dios li Davide

Q'ueoj yu'un David; ja' la sventain li banquilal yu'un jq'ueojetique.

¹ Jun co'nton la jmala tscoltaun li Muc'ul Diose; laj yac' xchiquin ta jtojol, laj ya'ibun li coq'uele.

² La sloq'uesun tal ta yut ch'en ti te xa'ox chicham oe; la sloq'uesun tal ta yut ach'eltic. La sva'anun lec ta tsatsal ton; lec tsots la stec'ananbun cacan.

³ Laj yac' loc'uc ta que ach' q'ueoj, ja' puru slequilal li Dios cu'une. Ep boch'otic laj yilic, jech lic yich'ic ta muc' li Muc'ul Diose; lic xch'unic o.

⁴ Xcuxet no'ox yo'nton li boch'o ja' no'ox chch'un ti chcoltaat yu'un Muc'ul Diose, ti mu ja'uc chbat xchi'in li jtoybaetic xchi'uc li boch'o chich'ic ta muc' c'usitic mu ja'uc Diose.

⁵ Muc'ul Dios, Dios cu'un, toj ep xa li c'usitic labalic sba laj apase; li' oy o avo'nton ta jtojolcutic. Mu'yuc boch'o yan co'ol jech chac c'u cha'al vo'ot. Chac cal ca'ay, chac jpuc ca'ay li c'usi lec apasoje, pero mu xu' cu'un yalel scotol, yu'un toj ven ep ta jyalel.

⁶ Mu ja'uc lec chavil li amoton chavich' milbele, xchi'uc li c'usitic yan chavich' ac'bel amotonine. Mu ja'uc chac'an chic'bil matanal ta sventa chch'ay o li mulile, jech laj ajambun lec jchiquin ta ya'yel.

⁷ Ja' yu'un jech laj cal: “Li' oyune, jech chac c'u cha'al ts'ibabil jc'oplal te ta balbil vune.

⁸ Dios cu'un, ja' lec chavil ti ta jpas c'usi chac'ane, ti oy ta co'nton ta jch'un li amantale”, xichi.

⁹ Laj cac' ta ilel c'usi tuc' ta pasel ta stojol li yepal avu'untaque; mu'yuc bu la jmac que. Muc'ul Dios, lec xana' ti jech la jpase.

¹⁰ Mu'yuc bu la jnac' ta co'nton ti lec tuc' avo'ntone; laj cal ta jamal ti mu xana' xajel avo'nton, xchi'uc ti lec chacoltavane. Mu'yuc bu la jnac' ti c'u x'elan chac'uxubinvane xchi'uc ti melel c'usitic chavale; jamal laj cal ta stojol li yepal jchi'iltaque.

¹¹ Muc'ul Dios, mu me xapajes li c'uxubinel ta jtojole; scotoluc ora li' ac'o scoltaun o li slequil avo'ntone, xchi'uc li c'usitic melel avaloje.

¹² Yu'un li' xa sjoyibtaojun li c'usitic chopole; mu xa xlaj ta atel c'u yepal. Ta xa xisnet'un li jchopolile; mu xa xquil lec osil yu'un. Solel i'epaj ta jyalel, ech'em xa jech yepal jech chac c'u cha'al stsotsil jol; ta xa xlaj stsatsal co'nton yu'un.

¹³ Muc'ul Dios, avocoluc coltaun; la' coltaun ta ora.

¹⁴ Ac'o yalicuc ta q'uexlal li boch'otic chisa'icun sventa chismilicune; ta q'uexlaluc ac'o suticuc batel ta sva'lupatic li boch'o chopol c'usi snopojic ta jtojole.

¹⁵ Ta q'uexlaluc ac'o jatovicuc batel ta anil li boch'otic chislabanicune;

¹⁶ yan li boch'otic chasa'icote ac'o cuxetuc no'ox yo'ntonic ta atojol. Li boch'otic xcuxet no'ox yo'ntonic chacoltae, jech ac'o yalic scotol c'ac'al: “Toj ech'em smuc'ul li Muc'ul Diose”, ac'o xiicuc.

¹⁷ Li vu'une toj abul jba, toj me'onun. Muc'ul Dios, mu me xich'ay ta avo'nton, yu'un vo'ot no'ox chac'uxubinun, chacoltaun. Dios cu'un, mu xa me xamala jal ti chacoltaune.