Salmos 4 - Bible in Tzotzil de Chenalhó with Deuterocanon

Ja' no'ox smuc'ul co'ntontic li Diose

Q'ueoj yu'un David. Laj yich' tijel ta sonetic ti oy yaq'uiltaque; ja' la sventain li banquilal yu'un jq'ueojetique.

¹ Dios cu'un, tuq'uil jchapanvanej cu'un, tac'bun me jc'op ti c'alal chajc'opanote. C'alal ja'o oy ep jvocole, vo'ot laj amuq'uibtasbun co'nton. C'uxubinun, a'ibun me li jc'ope.

² Vo'oxuc ti chacontrainicune, ¿baq'uin to chlaj avo'ntonic ta soquesel li jc'oplale? ¿Baq'uin to chlaj avo'ntonic ta snopilanel li c'usi mu'yuc stue, ti ja' no'ox puru epalc'ope?

³ Na'ic me, li Muc'ul Diose ja' lec chil li boch'o tuc' yo'nton ta stojole. Na'ic me ti chiya'ibun jc'op c'alal ta jc'opan li Muc'ul Diose.

⁴ Xi'anic me, mu me xasa' amulic. C'alal jun avo'nton mocholoxuc ta avayabique, nopo lec ava'yic c'u x'elan li avo'ntonique.

⁵ Aq'uic milbil matanaletic ta slequil avo'ntonic; ja' no'ox pato avo'ntonic o yu'un li Muc'ul Diose.

⁶ Muc'ul Dios, ep li boch'otic jech chayalboxuque: “Ac'buncutic li alequilale; lec me xaviluncutic”, xiic.

⁷ Pero li vo'ote laj xa avac'bun ep xcuxetel co'nton; xjelov to jech chac c'u cha'al li boch'o oy ep strigo xchi'uc ya'lel sts'usube.

⁸ Jun co'nton chivay, ta ora no'ox ch-och jvayel, yu'un vo'ot no'ox ta aventa, Muc'ul Dios, ti jun co'nton cuxulun ta banamile.