Salmos 39 - Bible in Tzotzil de Chenalhó with Deuterocanon

Mu jaluc oy li jcuxlejaltique

Q'ueoj yu'un David; ja' la sventain li banquilal yu'un jq'ueojetic Jedutún sbie.

¹ Jnopoj ti ta jq'uel jba ta sventa li c'usitic ta jpase. Mu jc'an jsa' jmul xchi'uc li coq'ue; ta xcac'be lec freno li quee, yu'un li' oyic ta jtojol li boch'otic chopol yo'ntonique.

² La jmac li quee, mu'yuc c'usi laj cal o; mu'yuc iloc' ta que c'usi lec noxtoc, pero yantic no'ox i'epaj batel li c'usi c'ux chca'ye.

³ Solel xpulpun no'ox li co'ntone; la jnop ti yu'un tsanem c'oc' ta yut co'ntone, ja' yu'un tsots jech laj cal:

⁴ “Muc'ul Dios, ac'bun jna' bu to c'alal li coraile, jayib to c'ac'al chicuxi, yu'un jech ta jna' c'u to yepal c'ac'al li' cuxulun.

⁵ Ta jna' ti comcom li jcuxlejal avac'ojbune, unin jliquel cuxulun ta asat; scotol cristianoetic jmaq'uel no'ox ta satil cuxulic ta atojol.

⁶ Scotol cristianoetic jelovel no'ox chjelovic jech chac c'u cha'al yaxinaltic. Altic chbat yo'ntonic ta stsobel sc'ulejalic; mu sna'ic boch'o chich' comel.

⁷ Ja' yu'un li vu'une, Cajval, ¿c'usi yan ta jc'an? yu'un vo'ot no'ox jpatoj co'nton ta atojol.

⁸ Coltaun me ta sventa ti ep chijelov ta atojole; mu me xavac' stse'intaicun li boch'otic bolique.

⁹ “Vu'une la jmac que, mu'yuc c'usi laj cal; vo'ot no'ox atuc laj apas scotol.

¹⁰ Loq'uesbun xa yipal li majel laj avac'bune, yu'un chilaj xa yu'un li yipal ac'obe.

¹¹ Ta melel, ta nucul ta xbijub avu'un li boch'o ta sa' smule. Li c'usi toj tsots sc'oplal ta yo'ntone, chalilinbe jech chac c'u cha'al chlilij c'usi joch'inem. Li cristianoetique jmaq'uel no'ox ta satil cuxulic.

¹² “Muc'ul Dios, tsacbun li jc'ope; a'ibun ti xi'oc'olet chajc'opanote. Mu me teuc no'ox aq'ueloj ti chloc' ya'lel jsate, yu'un li vu'une j'ech'el beun no'ox ta atojol; jxanubalun no'ox jech chac c'u cha'al ijelovic li jmoltot jyame'taque.

¹³ Loq'uesbun xa li jvocole, ac'bun jcux jutuc, yu'un yo'to mu'yuc chicham, yo'to li' to oyun”, xcut li Muc'ul Diose.