Salmos 38 - Bible in Tzotzil de Chenalhó with Deuterocanon

Sc'opanel Dios c'alal oy jvocoltic ta scoj bu chopol chijbat

Q'ueoj yu'un David sventa oy c'usi la st'ab ta yo'nton.

¹ Muc'ul Dios, mu me xavutun ta sc'ac'al avo'nton; mu me xavac'bun jtoj jmul ta soquemal ajol.

² Yu'un li' xa ts'apajtic ta jbec'tal li flechaetic avu'une; Li' xa oy ta sba cac'ol li yalal ac'obe.

³ Scotol jbec'tal toj ip ta scoj ti la'ilin ta jtojole; scotol jbaquiltac lilijem ta scoj li jmule.

⁴ Yu'un li jmule ijelov xa c'alal ta jol; xco'laj xa xchi'uc jun alal icatsil ta cuchel chca'ay.

⁵ Ta xa xc'a', ta xtuib jtuch'emaltac ta scoj li jbolile.

⁶ Scotol c'ac'al puru at-o'nton chca'ay; solel libic'taj, liyal ta jyalel.

⁷ Solel chti'van li jpate; mu'yuc xa bu lec scotol jbec'tal.

⁸ Solel chevbil scotol li jbec'tale, alubenun xa o chca'ay; xi'avet ta scoj li xc'uxul co'ntone.

⁹ Cajval, xavotquin scotol li c'usitic ta jc'ane; mu'yuc macal ta asat li c'usi ta jic' co'nton yu'une.

¹⁰ Toj chechel chca'ay li co'ntone; ta xa xlaj scotol li jtsatsale; xmaclajet xa jsat yu'un noxtoc.

¹¹ Li boch'otic lec jc'opane, xchi'uc li cuts' calaltaque nom xa yac'oj sbaic ta scoj li jc'a'emale.

¹² Li boch'otic tsc'an chismilicune xchapanoj xa lec xch'ojonic; li boch'otic tsc'an chiyuts'intaicune chopol chc'opojic ta jtojol. Scotol c'ac'al tsnopic c'usi chiyuticun.

¹³ Pero li vu'une xco'laj xchi'uc cocun ta jpas jba, mu xca'ay yilel; uma'un yilel, mu'yuc bu chic'opoj.

¹⁴ Mu xca'ay o yilel li c'usi chalique; mu'yuc c'usi chloc' jbeluc ta que sventa ta jpoj jba.

¹⁵ Muc'ul Dios cu'un, ja' no'ox ta jmala ti vo'ot chacoltaune, xchi'uc ti ac'o atac'bun li jc'ope.

¹⁶ Ja' no'ox ta jc'anbot ti mu me stse'inic ta jtojole, ti mu me stucuc xa xa'ay sbaic ti c'alal chiyal ta lume.

¹⁷ Ta melel po'ot xa sc'an xiyal ta lum chca'ay; me jutuc mu x'ech' o li c'usitic c'ux chca'ye.

¹⁸ Ja' yu'un ta xcal ta jamal li jmule; ta xcat co'nton yu'un li c'usi chopol jpasoje.

¹⁹ Yu'un li cajcontrataque lec cuxulic li stuquique, lec tsotsic. Toj ep li boch'otic jech no'ox stsoq'uet yo'ntonic cu'une.

²⁰ Li c'usitic lec jpasoje la sc'atajesbicun ta chopol; chiscontrainicun ta sventa ti ja' no'ox ta jpas c'usitic leque.

²¹ Muc'ul Dios, mu me xacomtsanun; Dios cu'un, mu me xanamaj ta jtojol.

²² Cajval, jcoltavanej cu'un, la' coltaun ta ora no'ox.