Salmos 37 - Bible in Tzotzil de Chenalhó with Deuterocanon

Mu'yuc c'usi lec tstaic li boch'o chopol yo'ntonique

Q'ueoj yu'un David.

¹ Mu me xlaj smuc'ul avo'nton yu'un li boch'otic chopolique; mu me xti'etuc avo'nton yu'un li boch'otic chopol c'usitic tspasique.

² Yu'un ta anil no'ox xu' chich'ic bojel jech chac c'u cha'al ts'i'lal; ta anil no'ox xu' chtaquijic jech chac c'u cha'al yaxal ts'i'lal.

³ Ja' pato avo'ntonic yu'un li Muc'ul Diose; ja' pasic li c'usitic leque xchi'uc li c'usitic melele, jech jun avo'nton chanaquiic ta banamil.

⁴ Ja' no'ox ac'o avo'nton o ta stojol li Muc'ul Diose, jech ja' chayac'bot li c'usi oy ta avo'nton chac'anbee.

⁵ Ac'bo sventain Muc'ul Dios scotol li c'usi chapase; ch'uno ta avo'nton ti xu' yu'une, jech chaspasbot li c'usi tsots sc'oplal oy ta avo'ntone.

⁶ Ja' chlic yac' ta ilel ti lec, ti tuc' c'usi chapase, jech chac c'u cha'al lec xquiltic osil ta sac osile, xchi'uc ti lec xojoban c'ac'al ta o'lol c'ac'ale.

⁷ Mu me xac'opojic ta stojol li Muc'ul Diose; malao ava'yic c'u x'elan chascoltaoxuc. Mu xa'ilinic ta stojol li boch'o oy c'usi lec tsta ti chopol c'usi tspase.

⁸ Comtsanic li ilinele xchi'uc li sc'ac'al avo'ntonique; mu me xa'ilin, yu'un xu' chopol chbat avu'un.

⁹ Yu'un li boch'o chopolique, j'ech'el chlajic o; yan li boch'o ja' nabalic o ta stojol Muc'ul Diose ja' chu'uninic o li yosilalique.

¹⁰ Mu xa jaluc li' oyic li boch'otic chopolique; ac'o me chasa'ic to, pero mu xa xataic o.

¹¹ Yan li boch'otic biq'uit chac' sbaique ja' chu'uninic o li yosilalique; jun no'ox yo'nton te oyic o.

¹² Li boch'otic chopolique ta mucul chchapanic c'u x'elan tscontrainic li boch'otic lequique; xc'uxet no'ox yeic ta stojol.

¹³ Pero li Cajvaltique stse'in no'ox ti jech tspasique, yu'un sna'oj ti po'ot xa chlaj yorailique.

¹⁴ Li boch'otic chopolique tsloq'ues ta sna li yespadaique, tst'inan xa lec li sflechaique, yu'un chac'beic li boch'o abul sbaique, ti biq'uit yac'oj sbaique, xchi'uc chac'beic li boch'o tuc' c'usi tspasique.

¹⁵ Pero li yespadaique ja' chajvalin stuquic; li sflechaique biq'uitic chlilij.

¹⁶ Ac'o me jutuc no'ox c'usi oy yu'un li boch'o tuc' yo'ntone, ja' toj lec; yan li c'usitic oy yu'un jc'ulejetique mu'yuc stu.

¹⁷ Yu'un li boch'o chopolique chlaj sc'oplal; yan li boch'o lequique ja' icabilic o yu'un li Muc'ul Diose.

¹⁸ Li Muc'ul Diose ja' xchabiojbe yorail li boch'o tuc' yo'ntonique; li c'usi ch-ac'bat yu'uninique mu sna' xlaj o.

¹⁹ Mu xq'uexovic ti c'alal yorail oy svocolique; lec noj xch'utic ti c'alal yorail vi'nale.

²⁰ Pero li boch'o chopolique chch'ayic o. Li yajcontra Muc'ul Diose ch-ulic ta c'oc' jech chac c'u cha'al xepual chij; chch'ayic o batel jech chac c'u cha'al ch'ayil.

²¹ Li boch'o chopolique oy c'usi chch'aman, pero mu sc'an sutesic; pero li boch'o tuc' yo'ntone oy slequil yo'nton, chc'uxubinvan.

²² Li boch'o lec sc'oplalic yu'un Muc'ul Diose ta x'ac'bat yu'uninic li banamile; yan li boch'o chopol sc'oplalic yu'une ja' chich'ic ulesel.

²³ Li Muc'ul Diose ja' tstuq'uibtasbe batel yacan ta xanubal li cristianoetique; ja' sventain batel ta sbe xanebic.

²⁴ C'alal chjach'e, muc teuc mochol chcom o, yu'un te tsacbil yu'un li Muc'ul Diose.

²⁵ Queremun to'ox, pero tana chimalub xa. Mu'yuc bu laj quil ti oy tscomtsanat stuc li boch'o tuc' yo'ntone; mu'yuc bu laj quil ti ch-ochic ta c'an limosna li yalab xnich'nabe.

²⁶ Scotol c'ac'al mu xlaj cha'ay c'usi chac', xchi'uc oy c'usi chac' ta q'uexel; li yalab xnich'nabe ja' jun bendición c'otem ta stojol.

²⁷ Voc'o aba ta sventa c'usi chopol, ja' paso li c'usi leque, jech jun avo'nton te nacalot.

²⁸ Yu'un li Muc'ul Diose ja' lec sc'anoj li boch'o tuc' c'usi tspase, mu scomtsan o li boch'o lecubtasbilic xa yu'une, scotol ora xchabioj o; yan li yalab xnich'nab boch'otic chopolique chich'ic ulesel o.

²⁹ Li boch'o tuc' yo'ntonique ja' chu'uninic o li yosilique, jech jun yo'nton te chnaquiic o.

³⁰ Li boch'o tuc' yo'ntone oy lec sbijil ti c'alal chlo'ilaje; li boch'o tuc' yo'ntone tuc' li c'usi chloc' ta yee.

³¹ Ja' te oy o ta yo'nton smantal li Dios yu'une, ja' yu'un me jutuc mu xjaxbuj o yacan.

³² Li boch'o chopole tsmala ta mucul li boch'o tuc' yo'ntone, yu'un oy ta yo'nton tsmil.

³³ Pero li Muc'ul Diose mu'yuc chac'be ta sc'ob; mu xac' ti ac'o oyuc smul chcom li boch'o tuc' yo'ntone.

³⁴ Ja' no'ox naban aba o ta stojol li Muc'ul Diose; ch'unbo li c'usitic chayalbote. Ja' chayac'ot ta ich'el ta muc'; ja' chayac'bot avu'unin o li avosilale, xchi'uc chavil lec ta asat chich'ic ulesel scotol li jpasmuliletique.

³⁵ Laj to'ox quil ti solel stoyoj sba li boch'o chopol yo'ntonique; mu'yuc c'usi xtal ta yo'ntonic jech chac c'u cha'al jtec' te' ti lec yoxe.

³⁶ Pero ijelov o batel, tana mu'yuc xa li' oye; laj to jt'un, pero muc xa jta o.

³⁷ Q'uelo lec avil li boch'o lec yo'ntone, ti lec c'usitic tspase; oy c'usi tsta ta ts'acal ti toj leque, ja' ti jun yo'nton oe.

³⁸ Yan li jbajmantaletique j'ech'el chbatic o; li smomnich'nab boch'otic chopolique j'ech'el ch-ulic o.

³⁹ Pero li boch'o tuc' yo'ntonique ja' chcoltaatic yu'un li Muc'ul Diose; ja' yip yo'ntonic ti c'alal yorail chtal tsots vocole.

⁴⁰ Li Muc'ul Diose ja' tscolta, ja' tspoj; ja' tscolta loq'uel ta sc'ob li boch'otic chopolique, yu'un ja' no'ox te spatoj yo'ntonic o ta stojol.