Salmos 36 - Bible in Tzotzil de Chenalhó with Deuterocanon

Toj ep c'uxubinel yu'un li Diose

Q'ueoj yu'un David, ja' li yajtunel Diose; ja' la sventain li banquilal yu'un jq'ueojetique.

¹ Li c'usi chopol oy ta yo'nton jun jpasmulile jech ch-albat ta yo'nton: “Mu'yuc ta xixi' yu'un li Diose”, xi chtal ta yo'nton.

² Tsnop ti lec no'ox oye; mu sc'an ac'o vinajuc, ac'o ilbatuc li c'usi chopol tspase.

³ Puru bolc'op, puru lo'lavanej chloc' ta ye; boliben xa'o, mu'yuc xa c'usi lec tspas.

⁴ Puru chopol xa c'usi tsnopilan o c'alal mochol ta svayab. Ja' xa stamoj o batel li chopol bee; mu xa sc'an xilinta o li c'usi chopole.

⁵ Pero vo'ote, Muc'ul Dios, xc'ot c'alal to ta vinajel li c'uxubinel avu'une; xjelov c'alal to ta yac'ol toquetic li alequil atuq'uile.

⁶ Li stuq'uil avo'ntone ja' jech chac c'u cha'al epal toyolal te'etic. Ti c'u x'elan tuc' chaventainvane ja' jech chac c'u cha'al muc'ta nab ti toj nat xchaque. Li vo'ote, Muc'ul Dios, achabioj li cristianoetique xchi'uc li chonbolometique.

⁷ Toj jun no'ox yutsil li c'uxubinel avu'une, Dios cu'un, ja' yu'un li cristianoetique te chtal spoj sbaic ta yolon axic'.

⁸ Lec noj xch'utic o ta sventa li ve'liletic te ta anae; ja' chavac'be yuch'ic li uc'um toj c'upil sbae.

⁹ Yu'un vo'ot te oy ta atojol li nio' sventa cuxlejale; ta axojobal no'ox ta xquilcutic saquil osil.

¹⁰ C'uxubino o li boch'otic xayotquinicote; tuc' me xachapan li boch'otic tuc' yo'ntonic ta atojole.

¹¹ Mu me xavac' xpech'icun ta teq'uel li jtoybaetique; mu me xavac' stijicun ta sc'obic li boch'o chopolique.

¹² Q'uelavilic, iyalic xa ta lum li boch'otic chopol c'usitic tspasique; yich'ic xa o, mu xa xu' tstotsic o.