Salmos 35 - Bible in Tzotzil de Chenalhó with Deuterocanon

Sc'anel coltael ta stojol Dios

Q'ueoj yu'un David.

¹ Muc'ul Dios, contraino li boch'otic chiscontrainicune; ac'bo ya'ay li boch'otic tsc'an chistsalicune.

² Tsaco li amacubbaile; la' me coltaun.

³ Tsaco li alanzae, la' va'lebino aba achi'uc li j'uts'intavanejetique. Albun ca'ay ta co'nton ti vo'ot chacoltaune.

⁴ Ac'o q'uexovicuc, ac'o socuc sjol stuquic li boch'otic tsc'an chismilicune; ta q'uexlaluc ac'o jatovicuc sutel li boch'otic chopol c'usi snopojic ta jtojole.

⁵ Jech ac'o c'oticuc jech chac c'u cha'al jobel ti chcuchat batel ta iq'ue; ac'o nutsaticuc batel yu'un li yaj'almantal Muc'ul Diose.

⁶ Ac'o ic'ubuc osil ta sbeic, xchi'uc ac'o bilubuc sbeic; ac'o nutsaticuc batel yu'un li yaj'almantal Muc'ul Diose.

⁷ Yu'un jeche' no'ox ti tsc'an chisyaquicun oxe; jeche' no'ox ti la sjoq'uic jun ch'en yu'un tsc'anic te chi'och yalele.

⁸ Ja' ac'o c'otuc ta stojol stuquic li vocole, ch'ayem yo'nton ac'o taaticuc. Te ac'o syac sba stuquic ta syoquic; te ac'o ochicuc stuquic ta xch'enic.

⁹ Li vu'une toj xcuxet no'ox co'nton ta stojol li Muc'ul Diose; xitse'in no'ox ta sventa ti chiscoltaune.

¹⁰ Ta scotol co'nton, ta scotol jbec'tal jech chcal: “Muc'ul Dios, mu'yuc boch'o yan jech chac c'u cha'al vo'ot ti chacolta li boch'o abul sba ti mu'yuc c'usi oy yu'une. Vo'ot chacolta loq'uel ta sc'ob li boch'o toj ech'em xu' yu'unique, ti chuts'intaic li boch'o abul sbae”, xichi.

¹¹ Ta xliquic chopol testigoetic ta jcontra; ta sjac'bicun li c'usi mu jna'e.

¹² Li c'usi lec la jpasbeique puru chopol chispacbicun sutel; le'e ja' chiyac'bun ep at-o'nton.

¹³ Pero c'alal i'ipajic li stuquique, la jlap c'u'il sventa at-o'nton; laj cac'be svocol jbec'tal ta yictael ixim. Solel la jnijan jba ta sc'opanel Dios.

¹⁴ La jcuy jech chac c'u cha'al jun jchi'il; la jcuy jech chac c'u cha'al jchi'il ta voq'uel. Ep laj cat co'nton yu'un, jech chac c'u cha'al chcat co'nton c'alal chcham jme'.

¹⁵ Pero c'alal liyal ta lum ec li vu'une, jmoj la stsob sbaic la stse'intaicun. La stsob sbaic jech chac c'u cha'al yantic cristiano ti mu xcotquinane; mu x'ech' yo'ntonic o ta xiyuts'intaicun.

¹⁶ Ep na'leel, ep labanel, ep tse'intael laj yac'bicun; xc'uxet xa yeic la spasic ta jtojol.

¹⁷ Cajval, ¿me te no'ox aq'ueloj ti jech tspasique? ¡Coltaun me, yu'un tsc'an chismilicun!; mu me xavac' xismilicun li leonetic ti xme'etic no'oxe.

¹⁸ Ta stojol yepal avu'untac ta jtojbot ta vocol; ta stojol yepal ateclumal ta xcal alequilal.

¹⁹ Mu me xcuxetuc xa yo'ntonic ta jtojol li cajcontrataque; mu me stse'inicuc xa ta jtojol li boch'o jech no'ox chopol chiyilicune.

²⁰ Yu'un le'e mu ja'uc tsa'ic ti c'u x'elan mu'yuc c'ope; ja' no'ox tsnopic c'u x'elan tslo'laic li boch'otic mu sna' c'usi xalique.

²¹ Xch'obet no'ox yeic ta jlabanel, jech chalic: “Je jeee, q'uelavilic lec c'u x'elan”, xiic.

²² Muc'ul Dios, aviloj lec atuc. Mu me teuc no'ox xch'ay ta avo'nton; mu me xanamaj ta jtojol.

²³ Totsan me, julovan me, la' chapanbun li jvocole; Dios cu'un, Cajval cu'un, pojun me.

²⁴ Muc'ul Dios, Dios cu'un, chapanun me, yu'un vo'ot tuc' xachapanvan. Mu me stse'inic ta jtojol.

²⁵ Mu me jechuc xalic, mu me jechuc snopic: “Is-is, ja' jech ta jc'antic le'ne, yich' xa cu'untic pisine”, mu me xiicuc xa.

²⁶ Ac'o yalicuc ta q'uexlal li boch'otic xcuxet no'ox yo'ntonic ti oy jvocole; ac'o bic'tajicuc o ta q'uexlal li boch'o toj muc' yac'oj sbaic ta jtojole.

²⁷ Ja' ac'o avanicuc, ac'o cuxetuc no'ox yo'ntonic li boch'otic oy ta yo'ntonic ta jpas canale. Jech ac'o yalic scotol ora: “Toj ech'em smuc'ul li Muc'ul Diose; toj lec chil c'alal tsta jun yo'nton li yajtunele”, ac'o xiicuc.

²⁸ Ta xcal ta que ti toj tuc' xachapanvane; sbejel c'ac'al ta xcal alequilal.