Salmos 34 - Bible in Tzotzil de Chenalhó with Deuterocanon

Toj xcuxet yo'nton li boch'o ja' nabal o ta stojol Diose

Q'ueoj yu'un David ti c'alal la sc'atajes sba ta stojol li Abimeleque, jech ijipat loq'uel, jech la stam batel sbe.

¹ Scotol c'ac'al chquich' o ta muc' li Muc'ul Diose; mu xpaj que o ta yalbel li slequilale.

² Ta sventa Muc'ul Dios ti muc' c'otemune; a'yo ava'yic, vo'oxuc ti toj biq'uitoxuc no'ox chava'yique, cuxetuc avo'ntonic.

³ La' jmuq'uibtasbetic sc'oplal li Muc'ul Diose; la' cac'tic lec ta ich'bel ta muc' li sbie.

⁴ La jc'an coltael yu'un li Muc'ul Diose, jech laj ya'ibun li jc'ope; la scoltaun ta sventa scotol li xi'el chca'ye.

⁵ Li boch'otic yac'oj satic o ta stojol Muc'ul Diose, staoj xcuxetel yo'ntonic o; mu'yuc c'usi ora xu' tstsajub satic ta q'uexlal.

⁶ Li vinic li' oy ti toj abul sbae la sc'an vocol ta stojol li Muc'ul Diose, i'aybat li sc'ope; icoltaat ta sventa scotol li svocole.

⁷ Li j'almantal yu'un Muc'ul Diose te setel ta spat xocon li boch'otic ja' yich'ojic o ta muc' Muc'ul Diose, yu'un ta scoltaic.

⁸ Q'uelavilic, pasic preva ava'yic, toj lec li Muc'ul Diose. Toj jun no'ox yutsil li boch'o ja' no'ox spatoj yo'ntonic o ta stojole.

⁹ Vo'oxuc ti voc'biloxuc xa yu'un Muc'ul Diose, ich'ic o me ta muc'; yu'un li boch'o chich'ic ta muq'ue mu'yuc c'usi sc'an cha'yic o.

¹⁰ Li leonetique xu' cha'yic vi'nal, xu' tsta svocolic; yan li boch'o ja' tsa'ic Muc'ul Diose puru lec c'usi tstaic o.

¹¹ La'ic me jnich'nab, a'yic c'usi ta xcal; chajchanubtasoxuc ta yich'el ta muc' li Muc'ul Diose.

¹² ¿Me chac'an chach'iic ep c'ac'ale? ¿Me chac'an chac'upinic li lequilale?

¹³ Q'uelo me abaic, mu me xloc' c'usi chopol ta aveic; pajeso me aveic ta epalc'op,

¹⁴ Voc'o me abaic ta sventa li c'usi chopole, ja' no'ox pasic li c'usi leque; ja' sa'ic ti c'u x'elan jun avo'ntonique, ja' no'ox pasic o batel.

¹⁵ Li Muc'ul Diose ja' te oy o sat ta stojol li boch'o tuc' yo'ntonique; lec tstuc'ulanbe sc'op ti c'alal chc'opanate.

¹⁶ Yan li boch'o chopol c'usi tspasique ja' chopol ch-ilatic yu'un li Muc'ul Diose, yu'un jech ac'o ch'ayuc o sc'oplalic ta banamil.

¹⁷ C'alal chc'opoj li boch'o tuc' yo'ntonique, li Muc'ul Diose cha'ay; ta scolta ta sventa scotol li vocol cha'yique.

¹⁸ Li Muc'ul Diose nopol oy ta stojol li boch'o oy svocol yo'ntonique; tscolta li boch'o lajem stsatsal yo'ntonique.

¹⁹ Toj ep tsta svocol li boch'o tuc' yo'ntonique, pero ta xcoltaatic yu'un li Muc'ul Diose.

²⁰ Ta xchabiatic lec; me junuc sbaquil mu xac' c'asbaticuc.

²¹ Li boch'otic chopolique te no'ox chmilatic yu'un li xchopolilique; li boch'o chopol chil li boch'o tuc' yo'ntonique ch-ac'bat stoj smul.

²² Li Muc'ul Diose tscolta li yajtuneltaque; mu x'ac'bat stoj smulic li boch'o xch'unojic ti ja' chcoltaatic yu'une.