Salmos 32 - Bible in Tzotzil de Chenalhó with Deuterocanon

Li boch'o chal ta jamal smule tsta perdón

Q'ueoj yu'un David.

¹ Xcuxet no'ox yo'nton li boch'o j'ech'el ich'aybat, ti j'ech'el ipasbat o perdón yu'un smule.

² Xcuxet no'ox yo'nton li boch'o mu'yuc lo'lavanej ta yo'ntone, xchi'uc ti mu x'ac'bat xcuch smul yu'un li Muc'ul Diose.

³ C'alal mu'yuc caloj ta jamal jmule, yantic no'ox chi'alub batel laj ca'ay, ja' ta scoj ti puru oq'uel, ti puru jic' o'nton ta jpase.

⁴ Yu'un ta c'ac'al ta ac'ubal la jcuchbe yalal li ac'obe. Chimats' xa batel laj ca'ay, jech chac c'u cha'al nichim ti tsmats' ta xc'uxul c'ac'ale.

⁵ Ja' yu'un laj calbot ta jamal li jmule; mu'yuc bu la jmuc ta co'nton li c'usi chopol jpasoje. Jech la jnop: “Ja' lec ta xcalbe ta jamal jmul li Muc'ul Diose”, xichi. Jech laj apasbun perdón, laj ach'aybun li jmule.

⁶ Ja' yu'un li boch'o jun yo'ntonique ac'o sc'anbicot vocol ti c'alal oy svocolique. Ac'o me chtal nojelal uc'um ta stojolic, mu xtaatic yu'un.

⁷ Vo'ot jnac'ubbailot, chapojun ti c'alal yorail oy jvocole; puru q'ueoj sventa coltael chtal sjoyibtaicun chca'ay.

⁸ Li Muc'ul Diose jech chal: “Vu'un ta jbijubtasot; vu'un ta jchanubtasot lec. Ta xcac'bot lec avil bu beal tsc'an chabat; scotol c'ac'al te oy o jsat ta atojol.

⁹ Mu jechuc chacom jech chac c'u cha'al ca', o mula, ti mu xich'be smelole, ti ja' to te chch'un mantal c'alal oy lec sfreno xchi'uc yaq'uiltaque. Me mu'yuque, mu xch'un o li mantale”, xi li Muc'ul Diose.

¹⁰ Ta to sta ep svocol li boch'otic chopol c'usi tspasique. Yan li boch'o xch'unojic o Muc'ul Diose, puru c'uxubinel tstaic.

¹¹ Vo'oxuc ti tuc' avo'ntonique, tse'inanic, cuxetuc no'ox avo'ntonic ta stojol li Muc'ul Diose; q'uejinanic no'ox, avetanic no'ox vo'oxuc ti tuc' avo'ntonique.