Salmos 31 - Bible in Tzotzil de Chenalhó with Deuterocanon

Ja' mero smuc'ul co'ntontic li Muc'ul Diose

Q'ueoj yu'un David; ja' la sventain li banquilal yu'un jq'ueojetique.

¹ Muc'ul Dios, vo'ot no'ox jpatoj o co'nton ta atojol; me jutuc mu xavac' xilaj ta lo'lael. Coltaun me, yu'un li vo'ote tuc' avo'nton.

² Tuc'ulanbun me li jc'ope; la' me coltaun ta ora. Vo'cot me li mero tsatsal tonot sventa ta jmac jba oe; vo'cot me li jnac'ubbailot sventa ta jpoj jba oe.

³ Ta melel vo'ot tsatsal ton, vo'ot jpojubbail c'otemot. Tojobtasun, beiltasun batel sventa chaquich'ot ta muc'.

⁴ Coltaun ta sventa li syoquic ti t'inil xa yu'unique, yu'un vo'ot jpojvanejot cu'un.

⁵ Chcac' ta ac'ob li jch'ulele; coltaun me, Muc'ul Dios, vo'ot li Diosot ta melele.

⁶ Toj chopol chquil li boch'o chich'ic ta muc' loc'ometic ti mu'yuc stue, pero li vu'une Muc'ul Dios, ja' no'ox te cac'oj o co'nton ta atojol.

⁷ Xitse'in no'ox, xcuxet no'ox co'nton yu'un li xc'uxul avo'ntone. Aviloj xa c'u x'elan li jvocole; laj xa ana' ti ep at-o'nton chca'ye.

⁸ Muc xavac'un ta sc'ob li cajcontrataque; ja' te laj ava'anun ti bu mu xquich' taele.

⁹ Muc'ul Dios, c'uxubinun me, yu'un toj c'ux li jvocole. Ta xa xlaj yip jsat ta scoj at-o'nton; ta xa xlaj stsatsal co'nton; ta xa x'alub scotol jbec'tal.

¹⁰ Ta xislajesbun batel corail li xc'uxul jvocole; ta xiscomajesbun jabilal li puru jic' o'ntonale; ta xislajesbun jtsatsal li jvocole; ta xisc'unibtasbun scotol li jbaquiltaque.

¹¹ Li cajcontrataque sa'um tse'ejicun no'ox cha'yic; solel mu'yuc jtu chiyilicun li jchi'iltac ta nacleje; sc'a'epal saticun li boch'otic xcotquinane. C'alal chiyilicune, chjatovic batel ta anil.

¹² Solel j'ech'el sjipojicun o ta yo'ntonic; chamenun xa cha'yic o yilel. Ja' xa jech c'otemun yu'unic jech chac c'u cha'al bin ti biq'uitic lilijeme.

¹³ Chca'ay ti ep boch'otic xchaplajetic ta jtojole; puru xi'el xa oy ta jujujot ya'yel. Solel co'ol yo'nton chchapanic li c'usi tspasbicune; oy ta yo'nton tsc'an chismilicun.

¹⁴ Pero jpatoj co'nton avu'un, Muc'ul Dios, jech caloj: “Vo'ot Diosot cu'un”, xacutot.

¹⁵ Vo'ot oy ta ac'ob li coraile; coltaun me ta sc'obic li cajcontratac ti chiyuts'intaicune.

¹⁶ Xojobanuc tal asat ta jtojol, vu'un li avajtunelune; coltaun ta sventa slequil avo'nton.

¹⁷ Muc'ul Dios, mu me vu'cun xiyal ta q'uexlal, yu'un jc'anojbot xa vocol ta atojol. Ja' ac'o yalicuc ta q'uexlal li boch'otic chopolique; ac'o ochicuc ta yavil animaetic, jech chmac yeic o.

¹⁸ Jech ch'ab xiic o ta yalel li epalc'ope; ch'ab xiic o ta slabanel, ta slo'iltael, ta sbolc'optael li boch'o tuc' yo'ntonique.

¹⁹ Toj bats'i ep slequil avo'nton anac'oj ta sventa li boch'o chayich'icot ta muq'ue; ta sat cristianoetic chavac' ta ilel slequil avo'nton ta stojol li boch'o spatoj yo'ntonic ta atojole.

²⁰ Ta anac'unajeb atuc chanac', jech mu xc'ot ta pasel c'usi xchapanojic li cristianoetique; ta avaxinal atuc chamac, jech mu xtaat ta chopolc'optael.

²¹ Ich'bilucot ta muc', Muc'ul Dios, yu'un toj muc' sq'uelubil slequil avo'nton laj apas ta jtojol te ta lum c'alal setubilun yu'un cajcontrataque.

²² Jech la jnop ti c'alal ja'o mu xa xnel jvocol laj ca'ye: “Yu'un xa van la sjipun loq'uel ta stojol”, xichi. Pero c'alal xi'avet, xivocolet ta atojole, laj ava'ibun li jc'ope.

²³ Vo'oxuc ti tuc' avo'ntonique, c'anic me li Muc'ul Diose; ja' chchabiatic yu'un Muc'ul Dios li boch'otic jun yo'ntonique. Yan li jtoybaetique ch-ac'bat lec stojic yu'un li Muc'ul Diose.

²⁴ Oyuc me lec stsatsal avo'ntonic, vo'oxuc ti nabaloxuc o ta stojol Muc'ul Diose; mu me xchibaj avo'ntonic.