Salmos 30 - Bible in Tzotzil de Chenalhó with Deuterocanon

Q'ueoj sventa chich' tojbel ta vocol Dios

Q'ueoj yu'un David; ja'o la sq'uejintaic ti c'alal laj yaq'uic ta sc'ob Dios li ch'ulnae.

¹ Muc'ul Dios, li' ta xcal alequilal, yu'un laj atoyun liquel; muc xavac' stse'intaicun li cajcontrataque.

² Muc'ul Dios, Dios cu'un, la jc'anbot vocol, jech laj apoxtaun.

³ Muc'ul Dios, laj aloq'uesun tal ta sventa lajel; laj to avac' cuxicun, jech muc xibat ta ch'en.

⁴ Q'uejintabeic slequilal Muc'ul Dios, vo'oxuc ti tuc' avo'ntonique; albeic slequilal li xch'ul bie.

⁵ C'alal chlic sc'ac'al yo'ntone, jliquel no'ox; yan li slequil yo'ntone mu xlaj o sbatel osil. Me chcoc'ta jbatic ta ac'ubaltique, ta sacubel osile xcuxet xa'ox co'ntontic.

⁶ C'alal lec to'ox chbat cu'un scotole, jech laj cal ta co'nton: “Mu'yuc boch'o xu' chiyilbun jbic'tal”, xichi.

⁷ Yu'un ta slequil avo'nton atuc laj anacanun ti bu lec tsots pasbile. Pero c'alal laj anac' asat ta jtojole, i'och xi'el ta co'nton.

⁸ Muc'ul Dios, vo'ot no'ox ta jc'anbot vocol; Cajval, vo'ot no'ox xivocolet ta atojol.

⁹ ¿C'usi chata c'alal me licham, me li'och xa'ox ta ch'ene? ¿Me yu'un xu' to chalbot alequilal li ts'u'ilume? ¿Me yu'un xu' to chal ti puru melelic c'usi chapase?

¹⁰ Muc'ul Dios, a'ibun me li jc'ope; Muc'ul Dios, c'uxubinun me, coltaun me.

¹¹ Laj xa ac'atajesbun ta ac'ot li at-o'ntone; laj xa aloq'uesbun li c'u'il ti ch'ixlajan ta lapele, ja' xa laj avac'bun li c'u'il sventa q'uine.

¹² Ja' yu'un ta jq'uejinta o alequilal ta scotol co'nton; mu'yuc bu ta jpajes jba o ta sq'uejintael. Muc'ul Dios, Dios cu'un, sbatel osil chaquich'ot o ta muc', ta jtojbot ta vocol.