Salmos 3 - Bible in Tzotzil de Chenalhó with Deuterocanon

Sc'opanel Dios ta sventa sc'anel coltael

Q'ueoj yu'un David c'alal ijatov batel ta scoj ti icontrainat yu'un li xnich'on Absalone.

¹ Muc'ul Dios, toj ep li boch'otic chiscontrainicune, toj ep li boch'otic chopol chiyilicune.

² Ep li boch'otic jech chiyalbicun jc'oplale: “Le'e mu xcoltaat yu'un li Diose”, xiic.

³ Pero li vo'ote, Muc'ul Dios, vo'ot jmac c'otemot, jlequilal c'otemot, vo'ot chavac'bun lec stsatsal co'nton.

⁴ Xivocolet ta sc'anel coltael yu'un li Muc'ul Diose. La stac'bun tal jc'op te ta ch'ul vits yu'un.

⁵ Li vu'une jun co'nton chimochi, jun co'nton chilic, yu'un ja' chiscoltaun stuc li Muc'ul Diose.

⁶ Mu xixi' yu'un li epal cristianoetic ti tsc'an chiscontrainicune.

⁷ Muc'ul Dios, la' me; Dios cu'un, coltaun me. Lec'bo ta majel xocon sat li boch'o chiscontrainune; voc'bo ta majel yeic li boch'o chopol chc'opojique.

⁸ Muc'ul Dios, vo'ot no'ox xu' chacoltavan. Ac'bo bendición li jteclum avu'une.