Salmos 29 - Bible in Tzotzil de Chenalhó with Deuterocanon

Toj tsots yip sc'opojel li Muc'ul Diose

Q'ueoj yu'un David.

¹ Vo'oxuc ti te oyoxuc ta vinajele, albeic slequilal li Muc'ul Diose; albeic slequilal li svu'el stsatsale.

² Alic ti toj muc', ti toj jun yutsil sbi li Muc'ul Diose; ich'ic ta muc' te ta xch'ulna li Muc'ul Diose.

³ Li sc'opojel Muc'ul Diose xvinaj to c'alal ta ba muc'ul nab; li Dios ti ech'em svu'ele ja' tst'omes loq'uel chauc; li Muc'ul Diose ja' oy ta sc'ob scotol li epal vo'etique.

⁴ Li sc'opojel Muc'ul Diose toj ech'em yip; li sc'opojel Muc'ul Diose toj tsots svu'el.

⁵ Li sc'opojel Muc'ul Diose chjecan yalel sc'ob ch'ut te'etic yu'un, ja' li epal ch'ut te'etic ta Libanoe.

⁶ Chnic yu'un li svitsal Líbano xchi'uc Sirione; chbituj yu'un jech chac c'u cha'al bic'tal vacaxetic.

⁷ Li sc'opojel Muc'ul Diose tsjip loq'uel yat c'oq'uetic.

⁸ Li sc'opojel Muc'ul Diose chnic yu'un li xocol banamile; li Muc'ul Diose tsniques li muc'ta xocol banamil ta Cadese.

⁹ Li sc'opojel Muc'ul Diose tsc'asan yalel yu'un li muc'tic tulane; tslomes scotol li muc'tic te'etic ta toyolaltique. Te ta ch'ulna yu'une, scotolic jech chalic: “Toj ech'em svu'el”, xiic.

¹⁰ Li Muc'ul Diose ja' tspas ta mantal li vo'e; li Muc'ul Diose ja' Ajvalil, ja' jpasmantal sbatel osil.

¹¹ Li Muc'ul Diose ja' chac'be stsatsal yo'nton li steclumale; li Muc'ul Diose ja' chac'be bendición li steclumale. Ja' bendición ti jun yo'ntonic, ti mu'yuc xa c'op cha'yique.