Salmos 28 - Bible in Tzotzil de Chenalhó with Deuterocanon

Li Muc'ul Diose cha'ay li c'usi ta jc'anbetique

Q'ueoj yu'un David.

¹ Muc'ul Dios, vo'ot no'ox chajc'opanot. Vo'ot jnac'ubbailot jech chac c'u cha'al jun muc'ta ton, mu me xamac achiquin ta jtojol, yu'un me mu xatac'bun jc'ope, co'olun chic'ot jech chac c'u cha'al li boch'o j'ech'el chbatic o ta ch'ene.

² A'ibun me jc'op c'alal ta jc'anbot vocol, c'alal ta jtoy jc'ob ta stuq'uil ach'ulnae.

³ Mu me co'oluc xavac'un batel xchi'uc li boch'otic chopolique xchi'uc li boch'otic chopol c'usi tspasique. Yu'un li stuquique lec xa xc'opojic yilel, pero li yo'ntonique chopol.

⁴ Ac'bo stojol li yabtelique, ja' jech xatoj ti c'u x'elan chopol la spasique; ja' jech xatoj ti c'u x'elan lec snup xchi'uc yabtelique.

⁵ Yu'un muc xich'ic ta muc' avabtel; mu'yuc ta yo'ntonic li c'usitic apasoje. ¡Jineso o ta j'ech'el; mu xa me xacha'tots liquel!

⁶ Ac'o ich'atuc ta muc' li Muc'ul Diose, yu'un laj ya'ibun li jc'ope.

⁷ Li Muc'ul Diose ja' stsatsal co'nton; la jch'un ta co'nton ti chiscoltaune, jech la scoltaun. Jech stse'in no'ox co'nton; xila'et no'ox ta sq'uejintabel slequilal.

⁸ Li Muc'ul Diose ja' stsatsalic c'otem li steclumale. Ja' spojobbail, ja' jcoltavanej yu'un li ajvalil st'ujoje.

⁹ Muc'ul Dios, coltao me li ateclumale; ac'bo bendición li boch'otic ochem ta ac'obe. Chabio jech chac c'u cha'al jchabichij; petpunuc avu'un o scotol c'ac'al.