Salmos 27 - Bible in Tzotzil de Chenalhó with Deuterocanon

Ja' luz xchi'uc ja' jcoltavanej c'otem cu'untic li Muc'ul Diose

¹ Li Muc'ul Diose ja' luz c'otem cu'un, ja' jcoltavanej cu'un, jech mu'yuc boch'o xu' chixi' yu'un. Li Muc'ul Diose ja' sventainojbun jcuxlejal, jech mu'yuc boch'o xu' chistic'bun xi'el ta co'nton.

² C'alal tstsob sbaic sventa chismilicun li cajcontrataque xchi'uc li boch'o chopol yo'ntonic ta jtojole, ja' tsbosi yacan stuquic, jech chyalic ta lum.

³ Ac'o me chtal sjoyibtaicun epal soldadoetic, mu'yuc bu xpujpun xa co'nton ta xi'el; ac'o me xchapanoj xa sbaic chtal yac'bicun, pero mu'yuc bu chlo'ilaj o co'nton.

⁴ Jun no'ox li c'usi jc'anojbe o li Muc'ul Diose, jun no'ox li c'usi oy ta co'nton oe; ja' ti te chicom o ta xch'ulna ti jayib c'ac'al cuxulune. Te chca'ay c'u yutsil stuc li Muc'ul Diose; te chquich' o ta muc' ta xch'ulna.

⁵ Ja' chisnac'un te ta xch'ulna ti c'alal chtal chopol ora ta jtojole; ja' chisnac'un te ti bu nacal stuque; ja' chismacun ta muc'ta tsatsal ton.

⁶ C'alal me tsalbil icom cu'un li cajcontra te setelique, ta jmilbe smoton te ta xch'ulna sventa ta jtojbe ta vocol; ta jq'uejintabe, ta xi'avan ta yalbel slequilal li Muc'ul Diose.

⁷ Muc'ul Dios, a'ibun li jc'ope yu'un vo'ot chajc'opanot; c'uxubinun me, tac'bun li jc'ope.

⁸ Jech chal li co'ntone: “Ja' no'ox xasa' coltael yu'un li Muc'ul Diose”, xi; ja' yu'un, Muc'ul Dios, vo'ot no'ox chajsa'ot.

⁹ Mu me xanac' asat ta jtojol; mu me xajipun loq'uel ta sc'ac'al avo'nton, yu'un vo'ot atuc jcoltavanejot cu'un. Mu me xajip xatenun ta avo'nton, yu'un vo'ot Diosot cu'un, jcoltavanejot cu'un.

¹⁰ Ac'o me chisjip chistenun li jtot jme'e, pero li vo'ote, Muc'ul Dios, aventainojun o.

¹¹ Muc'ul Dios, chanubtasun ta spasel li c'usi chac'ane; tojobtasun batel ta tuq'uil be, yu'un jech mu xistaicun li cajcontrataque.

¹² Mu me xavac'be spas c'usi tsc'an yo'ntonic ta jtojol li cajcontrataque, yu'un liquem j'epalc'op testigoetic ta jcontrainel; tsc'an chispasbicun li c'usi tsc'an yo'ntonique.

¹³ Jutuc xa mu chchibaj co'nton ta atojol, pero jch'unoj ti ta ono'ox xquil slequil avo'nton li' ta banamile.

¹⁴ Junuc avo'nton ta stojol li Muc'ul Diose. Tsotsan me, paso ta tsots avo'nton. Ta melel junuc avo'nton malao chascoltaot li Muc'ul Diose.