Salmos 26 - Bible in Tzotzil de Chenalhó with Deuterocanon

Lec jun yo'nton o li boch'o lec c'usitic spasoje

Q'ueoj yu'un David.

¹ Muc'ul Dios, chapanun me, yu'un tuc' c'usi jpasoj ta atojol. Jun co'nton jch'unoj o ti vo'ot chacoltaune.

² Muc'ul Dios, q'uelbun avil c'usi oy ta yut co'nton, pasbun preva avil; chajo ta q'uelel avil c'usi jnopoj ta mero yut li co'ntone.

³ Li c'uxubinel avu'une li' oy o ta jtojol, jech scotol ora jun co'nton o ta atojol.

⁴ Mu'yuc bu la jchi'in li j'epalc'opetique; mu'yuc bu la jpas ta co'ol co'nton jchi'uc li jlo'lavanejetique.

⁵ Chopol laj quil c'alal tstsob sbaic li boch'otic chopolique; mu'yuc bu lichoti ta sts'el li jsa'muliletique.

⁶ Pocbil xa lec li jc'obe; mu'yuc xa li jmule, jech xu' xa chinopaj batel ta sts'el li scajleb amotone.

⁷ Yu'un jech xu' chi'avan ta jtojbot ta vocol, jech xu' chcal scotol c'u x'elan yutsil avabtel.

⁸ Muc'ul Dios, jun no'ox co'nton yu'un li ach'ulna bu nacalote, ja' li yavil bu oy alequilale.

⁹ Mu me xatuch'bun corail jech chac c'u cha'al chapasbe li jpasmuliletique; mu me xavac' co'ol chilaj ta milel jchi'uc li jmilvanejetique.

¹⁰ Yu'un li stuquique nojem ta sc'obic li c'usitic chopole; nojem ta sc'obic li smoton taq'uinic chch'amic ta scoj lo'lavaneje.

¹¹ Pero li vu'une tuc' c'usitic jpasoj ta atojol; coltaun me, c'uxubinun me.

¹² Li cacane tuc' batem o ta tuq'uil be; Muc'ul Dios, ta xcal alequilal ta stojol scotol li ateclumale.