Salmos 25 - Bible in Tzotzil de Chenalhó with Deuterocanon

Li Davide la sc'an tojobtasel yu'un Dios

Q'ueoj yu'un David.

¹ Muc'ul Dios, vo'ot no'ox chajc'opanot;

² Dios cu'un, vo'ot no'ox jpatoj co'nton ta atojol. Mu me jeche'uc xcac'be jba q'uexlal avu'un; ma'uc me xistse'intaicun li cajcontrataque.

³ Me junuc mu me xyalic ta q'uexlal avu'un li boch'o xch'unojic ti vo'ot chacoltae; ja' ac'o yalicuc ta q'uexlal li boch'o stoyoj sbaic ta atojole.

⁴ Muc'ul Dios, ac'bun quil li beetic avu'une; chanubtasun ta stamel li biq'uit be avu'une.

⁵ Beiltasun batel ta spasel li c'usi melelic avu'une; chanubtasun me, yu'un vo'ot Diosot. Vo'ot Jcoltavanejot cu'un; vo'ot no'ox jpatoj co'nton o ta atojol scotol c'ac'al.

⁶ Muc'ul Dios, na'o me li slequil avo'nton, xchi'uc li c'uxubinel avu'un ti mu'yuc slajebe.

⁷ Mu me ja'uc xana'bun li jmule xchi'uc li c'usi chopol jpasoj ta jbic'tale. Ja' me na'un ta sventa li yutsil slequil avo'ntone.

⁸ Li Muc'ul Diose toj lec, toj tuc'; ja' tstojobtas batel ta lequil be li jpasmuliletique.

⁹ Ja' tsbeiltas batel ta tuq'uil be li boch'o mu sna' bu chbatique; ja' chchanubtas ta spasel c'usi tuc' li boch'o mu c'usi sna'ique.

¹⁰ Yu'un scotol ti bu chijyic'utic Muc'ul Diose puru c'uxubinel, puru melelic ta sventa li boch'otic ja' chch'unbeic smantaltaque xchi'uc ti chich'ic ta muc' c'usi chapanbil yu'une.

¹¹ Muc'ul Dios, vo'ot ti ich'bil ta muc' abie, pasbun perdón yu'un li yepal jmule.

¹² Li boch'o chich' ta muc' Muc'ul Diose, ja' tstojobtasat c'usi lec beal ac'o st'uj.

¹³ Ch-ac'bat scotol li slequilale; li smomnich'nabe ch-ac'bat yu'uninic li banamile.

¹⁴ Li boch'o mero xchi'il sbaic xchi'uc Muc'ul Diose ja' li boch'o yich'oj ta muq'ue. Le'e ja' ch-ac'bat yotquin lec li c'usi chapanbil yu'un Diose.

¹⁵ Ja' no'ox te batem o jsat ta stojol li Muc'ul Diose, yu'un ja' chiscoltaun ta sventa scotol li c'usitic xi'bal sbae.

¹⁶ Muc'ul Dios, q'uelun me, c'uxubinun me, yu'un jtuc no'ox oyun, xchi'uc toj ep jvocol.

¹⁷ Yantic no'ox chisnet'un batel chca'ay li jvocole; coltaun ta sventa li c'op-o'ntone.

¹⁸ Q'uelbun avil li at-o'nton chca'ye, xchi'uc li jvocole; pasbun me perdón yu'un scotol li jmule.

¹⁹ Q'uelavil, yantic no'ox ch-epaj li cajcontrataque; solel chac sbiq'uicun ya'yic ta sc'ac'al yo'ntonic.

²⁰ Chabibun li jbec'tale, coltaun me; mu me xavac'un ta q'uexlal, yu'un jch'unoj ti xu' avu'un chacoltaune.

²¹ Chabiun ta sventa ti jun co'nton, ti tuc' co'nton ta atojole, yu'un ja' no'ox te cac'oj o co'nton ta atojol.

²² Dios cu'un, coltao me ta sventa scotol svocol li Israele.