Salmos 24 - Bible in Tzotzil de Chenalhó with Deuterocanon

Ajvalil yu'un lequilal

Q'ueoj yu'un David.

¹ Li Muc'ul Diose ja' yu'un sbejel li banamile; ja' yu'un scotol li c'usitic oye xchi'uc scotol li c'usitic cuxajtic ta banamile.

² Yu'un ja' la snacan ta ba nab li banamile; ja' la xchotan ta ba vo'etic.

³ ¿Boch'o xu' chmuy batel ta vits yu'un li Muc'ul Diose? ¿Boch'o xu' ch-och te ta ch'ulna yu'une?

⁴ Ja' no'ox li boch'o sac sc'ob xchi'uc sac yo'ntone, ti muc xich' ta muc' li c'usitic mu'yuc stue, ti muc st'abbe sbi Dios ta sventa epalc'ope.

⁵ Le'e ja' ch-ac'bat bendición yu'un li Muc'ul Diose; ja' chcoltaat ta spasel c'usi tuc' yu'un li Diose, ja' li jcoltavanej yu'une.

⁶ Ja' jech chc'ot ta pasel ta stojol li boch'otic ja' tsa'ic li Muc'ul Diose, ti ja' tsa'ic li Dios yu'un Jacobe.

⁷ Ti'naetic, jamo abaic; ti'naetic ti vo'one ono'ox te oyoxuque, te jamajtic comanic o, yu'un ta x'och tal li Ajvalil yu'un lequilale.

⁸ ¿Boch'o li Ajvalil yu'un lequilale? Ja' li Muc'ul Dios ti lec tsots xu' yu'une xchi'uc ti tsots yo'ntone; ja' li Muc'ul Dios ti lec xu' yu'un pleitoe.

⁹ Ti'naetic, jamo abaic; ti'naetic ti vo'one ono'ox te oyoxuque, te jamajtic comanic o, yu'un ta x'och tal li Ajvalil yu'un lequilale.

¹⁰ ¿Boch'o li Ajvalil yu'un lequilale? Ja' li Muc'ul Dios ti tspas ta mantal scotol te ta vinajele. Le'e ja' Ajvalil yu'un li lequilale.