Salmos 22 - Bible in Tzotzil de Chenalhó with Deuterocanon

Oq'uel ta sventa vocol xchi'uc q'ueoj sventa yich'el ta muc' Dios

Q'ueoj yu'un David; ja' la sventain li banquilal yu'un jq'ueojetique. Li sbi snuq'uilal laj yac'bee “Me' te'tical chij ta jujun sob”, xi.

¹ Dios cu'un, Dios cu'un, ¿c'u yu'un ti laj acomtsanune? ¿C'u yu'un ti mu xacoltaune? ¿C'u yu'un ti mu xava'ay ti xi'avet ta atojole?

² Dios cu'un, xivocolet ta atojol ta c'ac'altic, pero mu xatac'bun; jech noxtoc ta ac'ubaltique, mu'yuc bu ta jcux o co'nton.

³ Vo'ot li Ch'ul Diosote, vo'ot chapas mantal, ich'bilot ta muc' yu'un li Israele.

⁴ Vo'ot ti la spat yo'nton ta atojol li jmoltot jyame' ta vo'onee; la spat yo'nton, jech laj acolta.

⁵ La sc'anic vocol ta atojol, jech laj acolta loq'uel ta mozoil. Muc alticuc la spat yo'ntonic ta atojol; muc xavac' ta q'uexlal.

⁶ Li vu'une muc cristianoucun, ja' jechun jech chac c'u cha'al unin xuvit; na'lebilun, bajbilun no'ox yu'un li cristianoetique.

⁷ Scotol li boch'otic chiyilicune chislabanicun; ta xevan yeic, ta sjimulan sjolic ta jtojol, jech chalic:

⁸ “Le'e ja' spatoj yo'nton yu'un li Muc'ul Diose. Ac'o coltaatuc ta ora yu'un li Muc'ul Diose; ac'o c'uxubinatuc, yu'un toj lec c'anbil”, xiic.

⁹ Ta melel, vo'ot laj avac' svoq'uesun li jme'e; laj avac' ti jun co'nton c'alal chixchu'untasun to'ox li jme'e.

¹⁰ C'alal mu'yuc to'ox chivoq'ue, vo'ot ono'ox aventainojun; c'alal tiq'uilun to'ox ta yut xch'ut jme'e, vo'ot ono'ox Diosot cu'un.

¹¹ Mu me xavictaun comel jtuc, yu'un nopol xa x'ech' tal ta jtojol li tsots vocole, yu'un mu'yuc boch'o yan chiscoltaun.

¹² Yu'un li' sjoyibtaojicun epal tot vacaxetic, ja' li simarón tot vacaxetic te ta Basane.

¹³ Xjach'oj xa yeic ta jtojol, jech chac c'u cha'al león ti chtal xa voch'ivanicuque.

¹⁴ Ja' jechun jech chac c'u cha'al vo' ti chmal batele; li jbaquiltaque bichc'ujemic xa loq'uel ta sts'acaliltac. Li co'ntone ta x'ul batel ta yut jbec'tal jech chac c'u cha'al chab.

¹⁵ Li jtsatsale itaquij xa jech chac c'u cha'al ti'bin; li coq'ue la spac' xa sba ta jpac'o. Ta xa xicham avu'un chca'ay.

¹⁶ Yu'un li' xa sjoyibtaojicun li epal ts'i'etique; li' xa setelic ep li boch'otic chopol yo'ntonique. Laj xa sjot'ilanbicun li coc jc'obe.

¹⁷ Lec xa ta atel li jbaquiltaque yu'un jeche' xa chajajtic; li cajcontrataque me jutuc mu xch'ay satic ta jtojol.

¹⁸ Laj xa svoc'be sbaic li jc'u' jpoq'ue; laj xa spasic canal tajimol xchi'uquic li jlic jc'u'e.

¹⁹ Pero li vo'ote, Muc'ul Dios, mu me xacomtsanun; vo'ot li stsatsalot co'ntone, ac'bo me yipal tal, la' coltaun ta ora.

²⁰ Coltaun me ta sventa li milel ta espadae; mu me xavac' xismilicun li ts'i'etic le'e.

²¹ Pojun me, mu me xisti'un li leonetique; coltaun me, yu'un chixulicun li tot vacaxetic le'e.

²² Ta to xcalbe ya'yic ac'oplal li jchi'iltac ta voq'uele; ta to xaquich'ot ta muc' te ti bu tsobolique.

²³ Vo'oxuc ti avich'ojic ta muc' li Muc'ul Diose, albeic slequilal. Ich'ic ta muc' acotolic vo'oxuc li smomnich'naboxuc Jacobe. Nijan abaic ta stojol acotolic vo'oxuc li sts'unubaloxuc Israele.

²⁴ Yu'un mu'yuc la sbaj, mu'yuc chopol laj yilbe svocolic li boch'o oy svocolique; mu'yuc bu la snac' sat ta stojolic. La scolta ti c'alal ic'anbat vocol ta stojole.

²⁵ Ta xcal alequilal ta stojol scotol li avu'untaque; li c'usi caloj ta atojole ta xcac' c'otuc ta pasel ta stojol li boch'otic yich'ojicot ta muq'ue.

²⁶ Jun yo'nton chlic ve'icuc li boch'otic oy svocolique, lec chnoj xch'utic. Jech chlic yalbeic slequilal Muc'ul Dios li boch'otic ta ono'ox sa'ic li Muc'ul Diose, jech chcuxiic ep jabil.

²⁷ Scotol li jaychop cristianoetic oy ta sbejlijil banamile chlic sna'ic li Muc'ul Diose, chlic talicuc ta stojol, chlic yich'ic ta muc', chlic squejan sbaic ta stojol.

²⁸ Yu'un li Muc'ul Diose ja' tspas ta mantal scotol; ja' sventainoj scotol li cristianoetique.

²⁹ Ja' yu'un scotol li boch'o tsnop ti lec xu' yu'unique ac'o yich'ic ta muc' li Muc'ul Diose; li cristianoetic ti ta ono'ox xc'atajic ta pucuque ac'o squejan sbaic ta stojol, yu'un mu xu' yu'un chcuxiic ta stuquic no'ox.

³⁰ Li jmomnich'nabtac ta ts'acale ta to xich'ic ta muc' li Muc'ul Diose; ta to xalbeic sc'oplal Muc'ul Dios ti jayib c'ac'al cuxulique.

³¹ Li boch'otic mu'yuc to voq'uemique ta to xalic ti toj tuc' chchapanvan li Muc'ul Diose; ta to xalic ti toj lec yabtele.