Salmos 21 - Bible in Tzotzil de Chenalhó with Deuterocanon

Q'ueoj sventa icol loq'uel ta sc'ob yajcontra li Davide

Q'ueoj yu'un David; ja' la sventain li banquilal yu'un jq'ueojetique.

¹ Muc'ul Dios, li ajvalile toj xcuxet no'ox yo'nton ta sventa li avu'ele; toj xcuxet no'ox yo'nton ta sventa ti laj acoltae.

² Laj apasbe li c'usi la sc'ane; muc xajalanbe li c'usi iloc' ta yee.

³ Loc' anup ta be xchi'uc ep abendición; laj avac'be lequil corona pasbil ta c'anal taq'uin.

⁴ La sc'anbot yorail, laj avac'be; Nat yorail laj avac'be, jal xu' chcuxi.

⁵ Toj ep slequilal la sta ta sventa ti laj acoltae; laj avac'be svu'el, xchi'uc laj avac' ta ich'el ta muc'.

⁶ Laj avac'be o ep bendición ta stojol; toj xcuxet no'ox yo'nton yu'un te ono'ox achi'inoj.

⁷ Li muc'ul ajvalile, mu xyal o ta lum, yu'un ja' nabal o ta stojol li Muc'ul Diose, yu'un xch'unoj o ti c'uxubinbil yu'un li Boch'o te oy ta vinajele.

⁸ Ch-och ta sc'ob scotol li yajcontrae; tstsal yu'un scotol li boch'o stsoq'uet yo'ntonic ta stojole.

⁹ C'alal chchapan c'u x'elan chcome, xu' yu'un tstic' ochel ta horno ti oy sc'ac'ale. Li Muc'ul Diose ja' chlic smil ta sc'ac'al yo'nton; tstic' ochel ta c'oc', jech te chc'ac' o.

¹⁰ J'ech'el chtu'p o sc'oplal ta banamil, j'ech'el ch-ul o sts'unubal li xnich'nab xchi'uc smomnich'nabtaque.

¹¹ Ac'o me oy c'usi tsc'an ox chispasbicun, ac'o me chapal xa lec yu'un c'usi tspasic, pero mu'yuc c'usi xu' yu'unic.

¹² Vo'ot laj avac' jatovicuc batel ta aflecha, yu'un laj avich' batel lec ta punto.

¹³ Muc'ul Dios, totsan tal achi'uc li avu'ele. Li' ta jq'uejintacutic, ta xcalcutic slequilal li avu'ele.