Salmos 2 - Bible in Tzotzil de Chenalhó with Deuterocanon

Sc'oplal yabtel boch'o t'ujbil yu'un Ch'ul Dios

¹ ¿C'u yu'un ti xvochlajetic no'ox ta xchapanel c'usi tspasic li yantic lumetique? ¿C'u yu'un ti svislajetic no'ox ta snopel li c'usi mu'yuc stue?

² Li ajvaliletic xchi'uc banquilaletic li' ta banamile tstoy sbaic; jmoj tsnopic ti tscontrainic li Muc'ul Diose xchi'uc li ajvalil st'ujoje.

³ Jech ch-avanic: “Jtuch'betic li scadenaique; jtituntic li ch'ojon ti xchucojutic oe”, xiic.

⁴ Pero li Cajval te nacal ta vinajele stse'in no'ox yu'un li c'usi chalique.

⁵ Ts'acal chlic ilinuc ta stojol, chlic sc'aq'uetan ta sc'ac'al yo'nton jech chalbe:

⁶ “Laj xa cac'be yabtel li ajvalil cu'une; laj xa jnacan te ta Sión, ja' li ch'ul vits cu'une”, xut.

⁷ Vu'un ta jvinajes c'usi snopoj li Muc'ul Diose, jech yalojbun: “Vo'ot jnich'onot; ja' to laj cac' ta ilel ti vo'ot Jnich'onote.

⁸ C'anbun, vu'un chacac'bot avu'unin li banamiletique, chacac'bot c'alal to ta sti'iltac li banamile.

⁹ Lajesbo stsatsalic ta ataq'uinal vaston li ajvaliletic li' ta banamile. Biq'uitic xalilin jech chac c'u cha'al bin patbil ta lum”, xi.

¹⁰ Ja' yu'un, ajvaliletic, bijanic me; jpasmantaletic ta banamil, ch'unic me li tojobtasele.

¹¹ Tunanic me yu'un li Muc'ul Diose, ich'ic me ta muc'; biq'uit me xavac' abaic ta stojol.

¹² Yu'un jech mu x'ilin ta atojolic, naca me chamanic ta be yu'un; yu'un mu vocoluc xu' tstsan li sc'ac'al yo'ntone. Xcuxet no'ox yo'nton li boch'otic ja' spatoj yo'ntonic yu'une.