Salmos 19 - Bible in Tzotzil de Chenalhó with Deuterocanon

Li c'usitic pasbile chalbeic slequilal li Diose

Q'ueoj yu'un David; ja' la sventain li banquilal yu'un jq'ueojetique.

¹ Li vinajele chac' ta na'el smuc'ul tsatsal li Diose; ti c'u smuc'ul yox ta toyole chac' ta ilel c'usitic spasoj li Diose.

² Li c'ac'aletique ja' chalilanbe sbaic o; li ac'ubaletique ja' tspuquic batel.

³ Ac'o me mu xvinaj c'usi chalic, ac'o me mu xca'ibetic sc'opic,

⁴ pero li sc'opique puquem batel ta sbejel banamil, c'otem c'alal to ta sti'iltac banamil li c'usi chalique, c'otem c'alal to ta smaleb c'ac'al.,

⁵ Ja' yu'un li c'ac'ale xcuxet no'ox yo'nton tstam batel sbe yan velta, jech chac c'u cha'al li boch'o ch-anilaje, jech chac c'u cha'al jun querem ti chbat xa nupinuque.

⁶ Ta jot to sti' vinajel chc'ot loc'uc; chjoyij batel yan velta ta jot sti', jech mu'yuc boch'o xu' chjatov ta scoj li xq'uixnale.

Li sc'op Diose oy lec stu cu'untic

⁷ Li smantal Muc'ul Diose toj lec, yu'un chisjelbutic co'ntontic; Li taq'uiel yu'un Muc'ul Diose mu xjel o, lec chbijub li boch'o mu c'usi sna'e.

⁸ Li chanubtasel yu'un Muc'ul Diose toj tuc', chijyac'butic lec xcuxetel co'ntontic. Li bijubtasel yu'un Muc'ul Diose mu'yuc c'usi capbil o; lec chjam jba jsatic yu'un.

⁹ Li yich'el ta muc' Muc'ul Diose toj lec; mu xlaj o sbatel osil. Li chapanel yu'un Muc'ul Diose puru melel, yu'un lec tuc' chchapan.

¹⁰ Ja' toj ven tsots sc'oplal jech chac c'u cha'al bats'i lequil c'anal taq'uin, xjelov to xchi'il jech chac c'u cha'al spom muc'ta pom.

¹¹ Ja' sventa chibijub o vu'un li avajtunelune; toj lec chibat yu'un me ta jch'une.

¹² Mu'yuc boch'o sna' ti c'u yepal chjelov ta atojole. Muc'ul Dios, ts'icbun ti bu c'alal mu jna'e.

¹³ Vu'un li avajtunelune, loq'uesbun ta co'nton li toybaile; mu me xavac' xistsalun, jech mu jta o jmul, jech mu jpas o li c'usi toj chopol chavile.

¹⁴ Muc'ul Dios, ja' ac'o loc'uc ta que, ja' ac'o jnopilan ta co'nton li c'usi lec chavile, vo'ot li muc'ta ton c'otemot cu'une, vo'ot li jpojvanejot cu'une.