Salmos 18 - Bible in Tzotzil de Chenalhó with Deuterocanon

Li Davide la stojbe ta vocol Dios c'alal icoltaat

Li'i ja' sq'ueoj David, ja' li yajtunel Diose. Ja'o la sq'uejinta ta stojol Muc'ul Dios ti c'alal yorail icoltaat loq'uel ta sc'ob scotol li yajcontrae xchi'uc ta sc'ob li Saule.

¹ Muc'ul Dios, lec ta jc'anot, yu'un vo'ot stsatsalot co'nton;

² vo'ot jchabivanejot cu'un, vo'ot jnac'ubbailot, vo'ot jcoltavanejot cu'un, vo'ot stsatsalot co'nton, vo'ot no'ox jpatoj co'nton ta atojol, vo'ot jmacubbail c'otemot. Ta avu'el xu' chacoltaun; lequil nac'ubbail c'otemot cu'un.

³ Muc'ul Dios, vo'ot no'ox ich'bilot ta muc'. C'alal ta jc'anbot vocol ta atojole, chacoltaun ta sventa li cajcontrataque.

⁴ La sts'otun ta snucul xch'ojon li lajele; lixi' yu'un li jmilvanej ti oy yip jech chac c'u cha'al nojelal uc'ume.

⁵ La sts'otun ta snucul xch'ojon li yavil animaetique; la syacun ta syoc li yavil animaetique.

⁶ C'alal ja'o oy ep jvocole, la jc'opan li Muc'ul Diose; la jc'anbe vocol li Dios cu'une. Laj ya'ibun jc'op c'alal to ta ch'ulna yu'un; i'och ta xchiquin ti xi'avet ta sc'anel vocol ta stojole.

⁷ Jech tsots inic li banamile, inic c'alal ta yibel li vitsetique; inic ta sc'ac'al yo'nton li Muc'ul Diose.

⁸ Yu'un xco'laj xchi'uc iloc' ch'ayil ta sni'; ja'o iloc' c'oc' ta ye ti chchic'vane, ja'o iloc' tsanajtic ac'al ta ye.

⁹ La sjam li vinajele, jech iyal tal; ta yolon yacane oy ep pimil ic'al toc.

¹⁰ La scajlebin jun querubín; ta xic' ivil batel ta ic'.

¹¹ Li ic'al toque la stunes ta sventa snac'ubbail; li ic' osil ta scoj li pimil toc xcuchoj ya'lele la stunes sventa la smac sba o ta joyob.

¹² Oy c'usi xleblej loq'uel ta stojol jech chac c'u cha'al sacsevul; iloc' tal ep bot ta toquetic xchi'uc iloc' tsanajtic ac'aletic.

¹³ Li Muc'ul Diose, li Boch'o te oy ta vinajele, ic'opoj tal ta vinajel jech chac c'u cha'al chauc; la syales tal ep botetic xchi'uc tsanajtic ac'aletic.

¹⁴ Laj yac' yalel tal flecha; la sjip yalel tal sacsevuletic, jech la spuc sbaic batel yu'un li cajcontrae.

¹⁵ Toj vinajel ic'ot xchac li natil nabe; toj jamel no'ox ic'ot snacleb banamil ta scoj xi'elal sc'op li Muc'ul Diose, ta scoj ti tsots la xjuch'tae.

¹⁶ Laj yac' tal sc'ob ta jtojol c'alal ta vinajel li Muc'ul Diose; la stsacun, la snitun loq'uel ta muc'ul nab.

¹⁷ La scoltaun ta sventa li cajcontratac ti ech'em xu' yu'unique, ti stsoq'uet yo'ntonic cu'une, ti xjelov xu' yu'unic jech chac c'u cha'al vu'une.

¹⁸ Tal scontrainicun ti c'alal ja'o oy ep jvocole; ja' la scoltaun li Muc'ul Diose.

¹⁹ La sloq'uesun ti bu oy jvocole; la scoltaun yu'un lec sc'anojun.

²⁰ Li Muc'ul Diose laj xa yac'bun jmoton; ja' jech jmoton laj yac'bun jech chac c'u cha'al lec cabtel jpasoje.

²¹ Yu'un ja' la jts'aclin o batel li be yu'une; mu'yuc la jch'ay ta co'nton li Dios cu'une.

²² Te ono'ox oy o ta co'nton li c'usi yaloje; mu'yuc bu la jbajbe li mantaletic yu'une.

²³ Mu'yuc jtaoj jmul ta stojol; mu'yuc la jpas li c'usi oy ta co'ntone.

²⁴ Ja' yu'un li Muc'ul Diose laj xa yac'bun jmoton ta sventa ti lec c'usi la jpas ta stojole.

²⁵ Muc'ul Dios, vo'ote chac'uxubin ec li boch'o chc'uxubinvane; tuc' c'usi chapasbe ec li boch'o tuc' c'usi tspase.

²⁶ Lec avo'nton ta stojol ec li boch'o lec yo'ntone; yan li boch'o chopol c'usi tspase, tsots c'usi chapas ta stojol.

²⁷ Vo'ote chacolta li boch'o biq'uit chac' sbae; li boch'o tstoy sbae ja' chabic'tajes.

²⁸ Muc'ul Dios, Dios cu'un, vo'ot chavac'bun lec luz ta jtojol; vo'ot ta aventa ti sac osil chquile.

²⁹ Vo'ot ta aventa xu' ta jtsal li cajcontrae; vo'ot ta aventa xu' chibituj jelovel ta sbaba li coralton yu'un slumalique.

³⁰ Li Diose lec tuc' li be yu'une. Li sc'op Muc'ul Diose ja' sventa ta jpat o co'ntontic; li Diose chchabi li boch'otic ja' no'ox spatoj yo'ntonic yu'une.

³¹ Mu'yuc yan Dios jech chac c'u cha'al li Muc'ul Diose; mu'yuc yan Dios ti xco'laj xchi'uc muc'ta tsatsal tone.

³² Li Diose ja' chiyac'bun lec jtsatsal, ja' ta sventa ti lec chbat cu'un li c'usi ta jpase.

³³ Ja' chisabaltajesbun cacan jech chac c'u cha'al yacan te'tical chij; ja' chiyicobun cacan ti bu toyolique.

³⁴ Ja' chisbijubtasbun jc'ob ta spasel pleito; ja' chiscoltaun ta snitel li flecha pasbil ta bronce ti toj tsots yipe.

³⁵ Ja' chispojun, ja' chiscoltaun; ja' chistsacun ta sbats'ic'ob ta sventa yutsil yo'nton ti lec chbat cu'un scotole.

³⁶ Mu'yuc jvocol yu'un ti c'alal lixanove; mu'yuc bu ijaxbuj cacan.

³⁷ La jta ta nutsel li cajcontrataque; ja' to lisut batel ti c'alal ilaj cu'un scotole.

³⁸ Biq'uitic la jlilin comel, muc xa stotsic o; mochajtic icom ta yolon cacan scotolic.

³⁹ Yu'un vo'ot laj avac'bun lec jtsatsal ta pas pleito; la sbic'tajes sbaic ta jtojol avu'un li jtoybaetique.

⁴⁰ Laj avac' jatovuc batel ta jtojol li cajcontrataque, jech ivu' cu'un la jtsal li boch'otic stsoq'uet yo'ntonic ta jtojole.

⁴¹ I'avanic to, pero mu'yuc boch'o xcoltaatic yu'un; laj to sc'anbeic vocol li Muc'ul Diose, pero muc xtuc'ulanbat sc'opic.

⁴² La jpas comel ta pucuc ti xu' chcuchat batel ta iq'ue; la jpech' comel ta teq'uel jech chac c'u cha'al ach'el ta xoraltic.

⁴³ Laj acoltaun ta sventa li jchi'iltac ti jbajmantaletique; laj atic'un ta banquilal yu'un li yantic banamiletique; ta xitun ta stojol li cristianoetic ti mu xcotquinane.

⁴⁴ C'alal cha'yic c'usi chcale, ta xch'unic; laj yac' sbaic ta jc'ob li yantic lumetique.

⁴⁵ Li yantic lumetique ilaj stsatsalic; xt'elajetic xa ta xi'el iloq'uic batel ti bu snac'oj sbaique.

⁴⁶ Toj lec li Muc'ul Diose. Ich'biluc ta muc' yu'un ja' jnac'ubbail. Ac'o muq'uibuc sc'oplal li Diose, ja' li jcoltavanej cu'une.

⁴⁷ Ja' jpac-ajvalil cu'un li Diose; ja' laj yac' bic'tajuc ta jtojol li cristianoetique.

⁴⁸ Ja' la scoltaun ta sventa li cajcontrataque; la scoltaun ta sventa li boch'o tstoy sbaic ta jtojole; la scoltaun ta sc'obic li boch'o tsc'an chismajicun, chiyuts'intaicune.

⁴⁹ Ja' yu'un, Muc'ul Dios, chcal batel alequilal ta yantic banamil; ta jq'uejinta li abie.

⁵⁰ Laj avac' spas canal li ajvalil at'ujoje. “C'ux ta avo'nton o sbatel osil li David xchi'uc smomnich'nabtaque”, xi laj yal c'alal la stojbe ta vocol Dios li Davide.