Salmos 17 - Bible in Tzotzil de Chenalhó with Deuterocanon

Sc'opanel Dios sventa ta jc'antic chapanel

Sc'opanel Dios yu'un David.

¹ Muc'ul Dios, a'ibun li ca'yeje, yu'un oy stuq'uil li c'usi chajc'anbote; tuc'ulanbun li coq'uel cavanel ta atojole, yu'un muc epalc'opuc li c'usi chacalbote.

² Ac'o licuc tal ta atojol atuc li chapanel chavac'bune, yu'un vo'ot xavotquin ti bu tuq'ue.

³ Laj xa ana' lec li c'usi oy ta co'ntone, yu'un li' chtal aq'uelun ta ac'ubal. Laj xa aq'uelbun c'u x'elan co'nton; mu'yuc c'usi chopol laj atabun. Mu'yuc caloj c'usi mu lecuc ta alel,

⁴ jech chac c'u cha'al tspas li cristianoetique. Laj xa jvoc' jba ta sbeic li boch'o chchapan ta yipal stuquic c'usi tspasique, yu'un ja' jech chal li mantaletic avu'une.

⁵ Jun co'nton ja' jtamoj o batel li be avu'une, jech muc xjaxbuj cacan ta xanubal.

⁶ Dios cu'un, vo'ot no'ox chajc'opanot, yu'un chava'ibun li jc'ope. Tuc'ulanbun me li jc'ope; a'ibun lec smelol li ca'yeje.

⁷ Ac'bun quil li slequil yutsil avo'ntone, yu'un li vo'ote chacolta ta stsalel yajcontra li boch'o tsc'anic coltael avu'une.

⁸ Chabiun me jech chac c'u cha'al lec chchabi yuninal sat li cristianoetique; luts'un lec ta yolon axic',

⁹ jech mu xistaicun li boch'otic chopol yo'ntonique, jech mu xistaicun li cajcontratac ti tsc'an chismilicune.

¹⁰ Li stuquique te pixilic o xchi'uc li c'usi tsc'an yo'ntonique; stuc no'ox yac'oj sbaic ti c'u x'elan chc'opojique.

¹¹ Jutuc xa mu chistaicun; tete satic c'usi ora xu' chisjipicun ta lum.

¹² Ja' jechic jech chac c'u cha'al león ti tsc'an tstsacvane, ti snac'oj xa sba lec ta snac'ubbail chmalavane.

¹³ Muc'ul Dios, la' me coltaun. Bat va'lebin aba achi'uc. Bat jipo ta lum. Ta avespadauc chicol loq'uel ta sc'ob li boch'otic chopolique.

¹⁴ Ta avu'eluc colem chicom ta sc'obic li cristianoetic li' ta banamile. Ac'bo li spuculalic li' ta banamile; Ac'o t'omuc o xch'ut xchi'uquic. Ac'o yich' c'alal ta yalab xnich'nabic; ac'o sta c'alal ta smomnich'nabtaquic.

¹⁵ Pero li vu'une, ta melel ta to jta ti bats'i lec noj jch'ut chicom oe, yu'un ta to jq'uelbot asat; ta to xital te ta atojol.