Salmos 16 - Bible in Tzotzil de Chenalhó with Deuterocanon

Toj lec c'usi chijyac'butic li Diose

Q'ueoj yu'un David.

¹ Chabiun me, Dios cu'un, yu'un vo'ot no'ox nabalun ta atojol.

² Vu'une jech calojbot: “Vo'ot Cajvalot, mu'yuc boch'o yan chiyac'bun jlequilal jech chac c'u cha'al vo'ot”, xacutot.

³ Li sloc'obaltac diosetic li' ta banamile tsots svu'el scuyojic li boch'o jun yo'nton yich'ojic ta muq'ue.

⁴ Pero ja' no'ox chepajes svocol stuquic li boch'otic chich'ic ta muc' sloc'obal yan diosetique. Vu'une me jutuc mu'yuc ta jtic' jba ta smilel li matanal yu'unique; me jutuc mu'yuc chloc' ta que sbi sventa chquich' ta muc' li diosetic yu'unique.

⁵ Muc'ul Dios, jtaoj xa scotol avu'un, avac'ojbun scotol li bendición avu'une; vo'ot oy ta ac'ob li jcuxlejale.

⁶ Toj lec cavil la jta avu'un; toj c'upil sba c'usi laj avac'bun cu'unin.

⁷ Ta xcalbe slequilal li Muc'ul Diose, yu'un ja' chistojobtasun; ta ac'ubaltic ja' chistuq'uibtasbun c'usi oy ta yut co'nton.

⁸ Scotol ora li' oy o ta jtojol li Muc'ul Diose, jech mu'yuc boch'o xu' chisjipun ta lum, yu'un li' oy o ta jbats'ic'ob.

⁹ Ja' yu'un toj xcuxet no'ox co'nton; jun yo'nton chcux li jbec'tale.

¹⁰ Yu'un muc teuc chacomtsanun o ta jmuquinal; mu'yuc chavac'be yil c'u x'elan c'a'el li ach'ulnich'one.

¹¹ Chavac'bun quil sbelal cuxlejal. Toj xcuxet no'ox te ta atojol; toj jun yutsil o sbatel osil te yo' bu oyote.