Salmos 150 - Bible in Tzotzil de Chenalhó with Deuterocanon

Ac'o quich'tic ta muc' Dios ta sventa sonetic

¹ Ich'ic ta muc' li Diose. Ich'ic ta muc' te ta xch'ulna li Diose; ich'ic ta muc' te ta vinajel.

² Ich'ic ta muc' ta sventa ti toj lec c'usitic spasoje; ich'ic ta muc' ta sventa ti mu albajuc c'u x'elan smuc'ule.

³ Ich'ic ta muc' ta oq'uesetic; ich'ic ta muc' ta muc'tic arpa xchi'uc ta yantic arpaetic.

⁴ Ich'ic ta muc' ta sventa ac'ot xchi'uc ta vobetic; ich'ic ta muc' ta sventa c'usitic oy yaq'uil, xchi'uc ta amaetic.

⁵ Ich'ic ta muc' ta sepsep taq'uin ti lec xchac'chun xbaq'ue; ich'ic ta muc' ta sepsep taq'uinetic ti lec sts'ints'un xbaq'ue.

⁶ Scotol li c'usitic chich'ic iq'ue ac'o yich'ic ta muc' li Muc'ul Diose. Ich'biluc ta muc' li Diose.