Salmos 15 - Bible in Tzotzil de Chenalhó with Deuterocanon

C'usi tsc'an tspas cristianoetic ta stojol Dios

Q'ueoj yu'un David.

¹ Muc'ul Dios, ¿Boch'o xu' chnaqui te ta ch'ulna avu'une? ¿Boch'o xu' chnaqui te ta ch'ul vits avu'une?

² Ja' no'ox li boch'o mu'yuc smule, ti lec c'usi tspase, ti melelic c'usi chale,

³ ti mu'yuc boch'o tsocbe yo'nton ta scoj yee, ti mu'yuc c'usi chopol tspasbe xchi'iltaque, ti mu soquesbe sc'oplal boch'o nopol nacajtic xchi'uque,

⁴ ti chilinta li boch'o chopol c'usitic tspase, ti chich' ta muc' li boch'o lec yich'oj ta muc' Muc'ul Diose, xchi'uc ti chc'ot ta pasel yu'un li c'usi yaloje, ac'o me te tsta o svocol xchi'uc.

⁵ Xchi'uc ti chac' ta q'uexel staq'uin ti mu sc'anbe sjole, ti mu xch'am smoton taq'uin yu'un ac'o scontrainic li boch'o mu'yuc smule. Li boch'o jech yo'nton chac le'e mu xyal o ta lum.