Salmos 149 - Bible in Tzotzil de Chenalhó with Deuterocanon

Taq'uiel ta sventa ac'o sq'uejintabeic slequilal Muc'ul Dios li israeletique

¹ Quich'tic ta muc' li Diose. Q'uejintaic ta ach' q'ueoj li Muc'ul Diose; ac'o yich' q'uejintabel slequilal te yo' bu tsobol li yu'untaque.

² Israeletic, cuxetuc avo'ntonic ta stojol li Boch'o la spasoxuque; jnaclumetic ta Sión, cuxetuc avo'ntonic yu'un li Ajvalil avu'unique.

³ Q'uejintabeic sbi ta ac'ot; q'uejintaic ta arpa xchi'uc ta vobetic.

⁴ Yu'un li Muc'ul Diose toj xcuxet yo'nton ta stojol li steclumale; li boch'otic biq'uit ch-ilatique chac' ta ich'el ta muc' yu'un chac'be stsal li yajcontrae.

⁵ Vo'oxuc li steclumaloxuque, cuxetuc no'ox avo'ntonic ta sventa ti apasojic canale; cuxetuc no'ox avo'nton q'uejinanic, ac'o me mocholoxuc ta avayabic.

⁶ Albeic slequilal Dios ta aveic; toyo ta ac'obic li avespadaic ti lec cha'jot yee.

⁷ Yu'un jech ac'o yich'beic spacol li yantic banamiletique jech ac'o stoj smulic li lumetique.

⁸ Jech xu' avu'un chachuquic ta tsatsal taq'uin li ajvaliletic yu'unique, jech xu' chachuquic lec ta tsatsal cadena li jpasmantaletic yu'unique.

⁹ Jech xu' chc'ot ta pasel chich'ic li stojol mulil yaloj Diose. Le'e ja' sventa chich' ich'el ta muc' li yu'untaque. Ich'biluc ta muc' li Diose.