Salmos 148 - Bible in Tzotzil de Chenalhó with Deuterocanon

Ac'o yalbeic slequilal Muc'ul Dios scotol li c'usitic pasbile

¹ Quich'tic ta muc' li Diose. Albeic tal slequilal te ta vinajel li Muc'ul Diose; albeic slequilal te ta toyol.

² Albeic slequilal vo'oxuc li yaj'almantaloxuque; albeic slequilal vo'oxuc ti yu'untacoxuc te ta vinajele.

³ C'ac'al, u, albeic slequilal li Muc'ul Diose; c'analetic, vo'oxuc ti xaxojobanic no'oxe, albeic slequilal ec li Muc'ul Diose.

⁴ Vinajel, vo'ot ti toyol oyote, xchi'uc vo'oxuc vo'etic, ti oyoxuc ta toyole, albeic slequilal li Muc'ul Diose.

⁵ Albeic slequilal sbi li Muc'ul Diose, yu'un ja' ta smantal ti jech i'ayin scotole.

⁶ J'ech'el laj yac' comuc o; laj yac'be lec jun mantal ta stojolic; persa ja' chch'unic o.

⁷ Albeic slequilal Muc'ul Dios li' ta banamil, vo'oxuc muc'tiquil chanul nabetic, vo'oxuc natil nabetic,

⁸ vo'oxuc c'oq'uetic ta vinajel, botetic, tayoetic, job osiletic, xchi'uc vo'oxuc muc'tiquil iq'uetic, chauquil vo'etic ti chapasbeic c'usi tsc'an li Muc'ul Diose.

⁹ Albeic slequilal, vo'oxuc muc'tic vitsetic, bic'tal vitsetic, jsatinom te'etic, ch'ut te'etic,

¹⁰ ts'unbilal chonbolometic, te'tical chonbolometic, vo'oxuc ti xana' xavilique, xchi'uc vo'oxuc quiletel chonetic.

¹¹ Albeic slequilal, vo'oxuc ajvaliletic ta banamil, ta bic'tal lumetic, banquilaletic, jpasmantaletic ta banamil,

¹² viniquetic, antsetic, queremetic, tsebetic, ololetic, mol me'eletic.

¹³ Albeic slequilal sbi li Muc'ul Diose, yu'un ja' no'ox stuc toj ech'em smuc'ul; ja' toj ech'em svu'el te ta vinajel xchi'uc ta banamil.

¹⁴ Ja' laj yac'be tsots svu'elic li steclumale; albeic slequilal acotolic vo'oxuc ti steclumaloxuque, vo'oxuc li yalab xnich'naboxuc Israele ti nopol oyoxuc ta stojole. Ich'biluc ta muc' li Diose.