Salmos 147 - Bible in Tzotzil de Chenalhó with Deuterocanon

Ja' sventainoj scotol c'usitic oy li Diose

¹ Ich'biluc ta muc' li Muc'ul Diose. Toj lec ta q'uejintael q'ueojetic ta sventa li Dios cu'untique; toj lec, toj c'upil sba ta albel li slequilale.

² Li Muc'ul Diose ta xcha'va'an li Jerusalene; ta stsob sutel tal yan velta li israeletic spucoj sbaic batele.

³ Ta xpoxta li boch'otic oy svocol yo'ntonique; ta xpixbe lec li xtuch'emalique.

⁴ Ja' yich'oj ta venta c'u yepal li c'analetique; ta jujubej ta sc'opan ta sbiic.

⁵ Toj ech'em smuc'ul li Ajvalil cu'untique, toj ech'em svu'el; mu'yuc spajebal li sbijile.

⁶ Li Muc'ul Diose tstoy liquel li boch'o toj biq'uit ch-ilatique; tsbic'tajes o ta j'ech'el li boch'otic chopolique.

⁷ Q'uejintabeic ta q'ueojetic slequilal li Muc'ul Diose; q'uejintaic ta arpa li Dios cu'untique.

⁸ Yu'un ja' chac' but'uc ta toc li vinajele; ja' chchapan tal li vo' sventa banamile; ja' chac' ch'iuc li ts'i'laletic ta vitsetique.

⁹ Ja' tsmac'lin li chonbolometique; ja' chac'be sve'el li yol jojetic ti c'alal xch'ivlajetique.

¹⁰ Li Muc'ul Diose ma'uc tspat yo'nton yu'un li ca'etic ti oy lec slomoique; ma'uc lec chil li viniquetic ti lec xaq'uique.

¹¹ Ja' lec chil li boch'o chich'ic ta muq'ue, ti ja' no'ox oy ta yo'nton tsmalaic li c'uxubinel yu'une.

¹² Jerusalén, albo slequilal li Muc'ul Diose; Sión, albo slequilal li Dios avu'une.

¹³ Yu'un ja' la stsatsubtas lec li sbajubiltac sti'ti' acoraltonale; laj yac'be bendición li anich'nab te nacajtique.

¹⁴ Ja' laj yac' pajuc muc'ta c'op ta avosilal; ja' chayac'bot ta ave' li bats'i lequil trigoetique.

¹⁵ Ja' tstac tal sc'op li' ta banamil; ta anil no'ox chvul li sc'ope.

¹⁶ Ja' chac' tal li tayo ti lec sac jech chac c'u cha'al saquil lanae; ja' ta stani tal jech chac c'u cha'al tan.

¹⁷ Ja' tstac tal li siquil bot ti lec xa pisajtic chvule; c'alal chtal scotol li siquile, tspat sba li vo'etique.

¹⁸ C'alal chal mantale, ch-ul batel; c'alal chac' tal iq'ue, chbein batel li ya'lele.

¹⁹ Laj yal lec sc'op smantal ta stojol li Jacobe; laj yac' lec chanubtaseletic ta stojol li Israele.

²⁰ Mu'yuc bu jech spasoj ta yan banamiletic; mu'yuc bu laj ya'yic c'u x'elan li chanubtasel tojobtaseletic yu'une. Coliyal Dios.