Salmos 146 - Bible in Tzotzil de Chenalhó with Deuterocanon

Ja' no'ox stuc xu' yu'un li Diose

¹ Quich'tic ta muc' li Diose. Scotol jol co'nton ta xcalbe slequilal li Muc'ul Diose.

² Ti c'alal li' to cuxulune, ta xquich' o ta muc' li Muc'ul Diose. Ti c'alal li' to chquich' iq'ue, ta jq'uejinta ta q'ueoj li Dios cu'une.

³ Mu xapat avo'ntonic yu'un li banquilaletique, yu'un cristianoetic no'ox; mu xu' yu'un chcoltavanic.

⁴ Sna' xchamic, chc'atajic ta lum yan velta, jech te chlaj sc'oplal o li c'usi snopojique.

⁵ Xcuxet no'ox yo'nton li boch'o ja' jcoltavanej yu'un li Dios yu'un Jacobe, ti ja' spatoj o yo'nton yu'un li Muc'ul Dios yu'une.

⁶ Ja' li boch'o la spas vinajel banamile, xchi'uc li nabetique xchi'uc scotol li c'usitic te oye; ja' li boch'o puru melelic c'usi chal sbatel osile.

⁷ Ja' li boch'o tuc' chchapan li boch'otic abul sbaic ta uts'intaele, ti chac'be sve'el li boch'otic oy vi'nal cha'yique. Li Muc'ul Diose tscolta li boch'otic chucbilique;

⁸ li Muc'ul Diose tsjambe sat li ma'satetique; li Muc'ul Diose tstoy liquel li boch'otic yalemic ta lume; li Muc'ul Diose c'ux ta yo'nton li boch'otic tuc' yo'ntonique.

⁹ Li Muc'ul Diose ta xchabi li yanlumetic li' nacalique, tscolta li me'on ololetic xchi'uc li me'on antsetique; yan li boch'otic chopolique chac' ch'ayicuc o ta be.

¹⁰ Sbatel osil ja' Ajvalil o stuc li Muc'ul Diose. Vo'ote Sión, li Dios avu'une ja' tspas mantal o ti jayc'ol cristianoetic chjelovic li' ta banamile. Coliyal Dios.