Salmos 145 - Bible in Tzotzil de Chenalhó with Deuterocanon

Toj ech'em smuc'ul stuc li Muc'ul Diose

Q'ueoj yu'un David sventa laj yalbe slequilal Dios.

¹ Ta xcal c'u x'elan amuc'ul, Dios cu'un, Ajvalil cu'un; ta xcal alequilal sbatel ora, sbatel osil.

² Jujun c'ac'al ta xcal alequilal; chaquich'ot ta muc' ta sbatel ora, ta sbatel osil.

³ Toj ech'em amuc'ul vo'ot li Muc'ul Diosote, vo'ot no'ox tsc'an chaquich'otcutic o ta muc'; mu'yuc boch'o sna' yalel c'u x'elan li amuc'ule.

⁴ Li jujuc'ol alab nich'nabetic chjelovique te chalilanic o batel c'u x'elan li avabtele; ta xalic ti toj muc'tic c'usitic apasoje.

⁵ Ta xalic c'u x'elan li avutsilal alequilale, xchi'uc ta jnopilan ec ti toj jun yutsil li c'usitic apasoje.

⁶ Ta xalilanic ti toj muc'tic, ti toj xi'balic sba li avabtele; li vu'une ta jpuc batel ec li amuc'ul atsatsale.

⁷ Ta xalic batel ti toj muc', ti toj ep slequil avo'ntone; ta sq'uejintaic li alequil atuq'uile.

⁸ Li Muc'ul Diose toj muc' yo'nton, toj ep c'uxubinel yu'un; mu sna' xlic sc'ac'al yo'nton ta ora, yu'un ja' toj muc' li c'uxubinel yu'une.

⁹ Li Muc'ul Diose toj lec yo'nton ta stojol scotol; toj c'ux ta yo'nton scotol li yabtele.

¹⁰ Muc'ul Dios, ac'o yich'icot ta muc' scotol li c'usitic apasoje; ac'o yalic alequilal scotol li avu'untaque.

¹¹ Ac'o yalic c'u x'elan slequil chapas mantal; ac'o yalic c'u x'elan li avu'ele.

¹² Yu'un jech ac'o sna'ic scotol cristianoetic ti toj muc'tic c'usitic apasoje, xchi'uc ti toj ech'em yutsil slequil chapas mantale.

¹³ Sbatel osil mu xlaj o li avabtel chapas mantale; sbatel osil vo'ot ajvalilot o yu'un scotol.

¹⁴ Li vo'ote, Muc'ul Dios, chavico li boch'o chyalic ta lume; chatoy liquel li boch'otic jeche' xa nijajtique.

¹⁵ Scotol te oy satic ta atojol, tsmalaic tsta yorail chavac'be sve'elic.

¹⁶ Li vo'ote chajam li ac'obe; chabusanbe yalel tal abendición scotol li c'usitic cuxajtique.

¹⁷ Li Muc'ul Diose stalel tuc' scotol c'usi tspas, stalel c'ux ta yo'nton scotol li yabtele.

¹⁸ Li Muc'ul Diose nopol oy ta stojol li boch'o tsc'anic vocole, ti scotol yo'ntonic xvocoletic ta stojole.

¹⁹ Ta xac'be c'usi tsc'anic li boch'otic chich'ic ta muq'ue; cha'ibe li sc'opic c'alal xvocoletique, jech ta scolta.

²⁰ Li Muc'ul Diose chchabi scotol li boch'otic lec sc'anojique; yan li boch'otic chopolique chules ta banamil.

²¹ Li quee ac'o yalbe slequilal li Muc'ul Diose; scotolic ac'o yalbeic slequilal xch'ul bi li' ta ora, xchi'uc c'alal to ta sbatel osil.